Shillong, Nailar 18 : U Myntri ka Koit ka Khiah Bah Wailadmiki Shylla yn iakynduh ia ki bor pyniaid ka NEIGRIHMS ha ka 19 tarik Nailar ban pynbeit ia ki jingsngewkhia u paidbah bad iakren ruh halor ka jingioh jingithuh kum ka Institute of National Importance (INI).
U Myntri u pyntip ba kane ka jingalang ka thmu ban tei ia ka jingshaniah u paidbah ha kane ka multi-speciality hospital, kaba u sngew ba dei kaba khlem pat pyndonkam bha da ki paidbah ka Jylla.
“Nga la thmu ia kane la slem bha. Ka NEIGRIHMS ka dei ka intitute kaba heh bha bad ka multi-speciality hospital, hynrei ym shym la shim kabu satia da ki trai shnong ia ka jingdon jong ka” ong u Bah Wailad haba iakren bad ki nongthoh khubor ha ka sngi Ba-ar.
“Nga kwah ban iakynduh ia ki bor pyniaid ban kylli ia kaei kaba ki thmu ban leh ha kaban ioh ia ka jingshaniah jong u paidbah ba kin wan shah sumar ha NEIGRIHMS” ula bynrap.
U Bah Wailad ula ong ba ka kyrdan INI jong ka Institute kan dei ka mat ba kongsan ha ka jingiakren.
“Ki don ruh kiwei ki pat, kum kaei kaba kila leh halor ka jingithuh INI ka NEIGRIHMS namar kane ka long kaba kongsan bha” ula ong.
Ia u Myntri yn synran da ki Ophisar na ka Tnad ka Koit ka Khiah.
.){kind=link}