Shillong, Nailar 18 : Ka Meghalaya Police FT ka la lah ban pynliem ia ka Champion Langsning FC da 2-1, haka jingiakhun Shillong Premier League 2026, ba long hynne ka nohphai sngi ha SSA Stadium, Polo.
Ia kine ki artylli ki kol ka MLP FT la thep ha baroh ki ar kylla jong ka jingiakhun lyngba u Rapborlang Marwein (44’) bad u Aldrin Ramsiej (89’).
Ia ka shi kol ban lait brut ka Langsning FC la thep ia ka da u Rohan Manar (90’+3).
Ha kane ka jingiakhun baroh ar kynhun ki la wanrah ia la ki jong ki jingkylla ha ka thup ialehkai sdang ka jong ki, ha kaba na ka liang ka MLP FT, u Niawkorlang Kyndiah bad Balmingstar Lyngkhoi ki la ioh ban mih madan ha ka jaka ka jong u Pynshailang L Lyngkhoi bad Bisharlang Kharumnuid.
Katba na ka liang ka Langsning FC ki jingkylla ha ka thup ialehkai naba sdang ka jong ka ka long ba u Nister Roy Suting, Richie Kharbani, Chusrang Sangma bad Samuel Phawa ki la ioh ban mih madan noh shwa ka jaka ka jong u Rajat Paul Lyngdoh, Wallambok Dkhar, Rohan bad Dibormi Kassar.
Kumban shu pynkynmaw ba ka kynhun ialehkai ka Langsning FC ka wan sha kane ka jingiakhun hadien ba ka la dep ba kan aireng ha ka lympung ialehkai jong ka Durand Cup 2026.
Pynban ka dur ka sur ialehkai ka jong ka, kam shim la long kumba la ap khmih lynti u paidbah nongwan peitkai uba bun, ha kaba ka kylla step la shem bad iohi ba ka la ioh tang artylli ki kabu ban ban jan ioh pynkhih ia ka jar kawei ha ka minit kaba 32 lyngba u Richie Kharpran bad une u juh pat u player u la ioh ia ka kabu kaba paka bha hynrei la lah ban kyrda noh pat ia ka da u rang gap kol ka MLP FT u Eveningstar Bareh.
Haba phai pat sha ka rukom ialehkai jong ka MLP FT, ki 45 minit ba la iakhun nyngkong, ki sei madan ia ka sur ialehkai ban nion shakhmat, kaba hangne ka freekick lyngba u Rapborlang ka la suh beit sha lyndet ka kol ka Langsning, kaba hangne u Nister um shim la iohi bha shuh shano kane ka bol ka don namar ka jingkah ki paralok ba ialehkai lang, kiba pyrshang ban iada ia ka, ia kaba kim shim la lah satia bad jlang ban khih hi ir ka jar.
Ban jin da la dei ha kiwei pat ki sngi, lehse ka kynhun ialehkai ka MLP FT hadien ba ka la tam shakhmat da shi kol kan jin da la ialeh ban kham tan suki noh ia ka rukom ialehkai ka jong ka, da kaba kan shu iakhun katba lah ban ieng iada da ka jingtam jong ka da shi kol, hynrei hynne part ka sngi kane kam shim la long satia, namar la shem bad iohi ba kum ka kynhun kam shim la leh satia kumne, pynban wat haba wan ban bteng pat sa ia ka kylla miet, kum ka kyhhun ka pyrshang katlah kat iai ba kan nion beit shakhmat, kaba lehse imat ki la shem bad iohi ia ka rukom ialehkai ki rang ka Langsning FC.
Shiban kum ka kynhun ka Langsning FC ka la shaniah tylli bha ha u Syed Ahmed uba la lah ban thep saw kol ha ka Durand Cup, hynrei mynta ka sngi, la shah tehlakam bha, ha kaba ka kabu ksiar kaba la mih paw na u ka dei tang kawei ka bol kaba u la ioh ba un head ia kaba la lah ban kyrda ia ka da u Eveningstar.
Shuh shuh ki la don ruh ki jingpynleh nohei ia kiba ba bun ki kabu ksiar kaba ki ar kynhun ki la ioh, kaba lehse kane ka la kham ktah jur bha ia ka kynhun ialehkai ka Langsning FC kaba kum ka lahduh jong kane ka lympung kan babe ba kam shim la lah ban pynurlong pat ia ka sha ki kol, hynrei na ka liang ka MLP FT wat la ka pynlehnohei, hynrei ka jingjop ba ka la ioh ba kan khur, kan dei ka sngi jong ka jingkmen bad kaban nang ai mynsiem shuh shuh ia ka na ka bynta ki jingiakhun kiban dang wan nangne shakhmat.
Kane ka lympung kumban shu ia tip lang da baroh ka dei beit tang shi kylla (single leg) kaba ka Langsning FC da kane ka namrem kaba mynta ka sngi, nangne hi shakhmat ka kynhun kan hap ba kan kyntiew joit ia la ka rukom ialehkai ka jong ka, lada ka thrang ba kan lah ban bat biang ia ka nam kum ka lahduh.
Da kane jingjop, ka MLP FT ka la ioh ba kan khur 4 point, katba ka Langsning FC ka ioh ba kan khur shwa tang 3 point.
