Shillong, August 18: U Myntri Rangbah ka Jylla u Conrad K Sangma hynne ka sngi Baar, ula lum ia ka jingialang ban khmih bniah ia ka jingpyntreikam ia ka Jal Jeevan Mission (JJM) bad ia ka jingpynkhreh ka Jylla ia ka Jal Jeevan 2.0 (Phase II), ha kaba la shem ba 322 tylli ki shnong ki donkam ia ka jingshah phaikhmat ban pynbiang bad ban pynpoi ia ka umbam umdih ha ki longiing longsem.
U Sangma ula lum ia ka jingialang bad ka Tnad Public Health Engineering (PHE) bad ka kynhun jong ka JJM Meghalaya, da kaba pynleit jingmut halor ka jingtreikam kaba long mynta ha kaban pynpoi ia ki kor um ha man la ki iing ki sem, ym da kaba shu kheiñ ia ka jinglah ban pynpoi ia ka umbam umdih.
Katkum ka jingkhmih bniah, 87.32% na ki shnong kila ioh man la ka por ia ka umbam umdih, katba 79.23% kila ioh man la ka sngi ia ka umbam umdih. Tang 71.74% kila kynjoh sha ka jinglah ban pyndap pynbiang ia ka jingdonkam, kaba pyni ia ka jingduna ia ka jingshaniah bad ka jingbun jong ka um ban poi ha ki iing ki sem.
“Ngi lah dep ban ithuh ia ki 322 tylli ki shnong kiba donkam ban phaikhmat bha” ong u Sangma haba thoh ha ka rynsan Social Media X, hadien ba lah dep pynlong ia katei ka jingialang.
Reviewed the progress of the Jal Jeevan Mission and our preparedness for Jal Jeevan 2.0 (Phase II) with the PHE Department and the JJM Meghalaya team.
As a follow-up to our last meeting, we reviewed the functionality of household tap connections to understand actual water… pic.twitter.com/VGbgYnEjov
— Conrad K Sangma (@SangmaConrad) August 18, 2026
Kane ka jingialang kala khmih bniah ruh ia ki daw halor ka jingbym lah ban treikam ki kor kum bad lah iatai sani ruh halor ka State Improvement Plan kaba kynthup ia ka jinglut ha kaban maramot, jingpyndiat biang, jingpyntreikam bad jingsumar bad ban pynneh pynsah ia ka skhim ban sam ia ka umbam umdih.
Kane ka jingialang kadei shi bynta ban buddien, ia ki jingialang kiba la dep ban lum ha ki bnai kiba lah dep ban khmih bniah biang ia ka jingpynpoi ia ki kor um ha man la ki longiing kiba don ha kylleng ki Block bad District ban pynthikna ba ka jingdon ka umbam umdih bad ban ithuh ia ki jingduna ha kaban pynpoi ia ka um bad ka rukom treikam.
U Sangma ula ong, ba ka jingpynleit jingmut ka sorkar ka long ban pynthikna ba man la ki kor um kidei ban ai ia ka um kaba shaniah, kaba dap bad kaba man la ka sngi sha man la ki longiing ha ka Jylla Meghalaya.
