Nongpoh, Risaw 09: Ka Adventurous Hynñiewtrep Off Roaders (AHOR) kala pynhap pyrda noh hynnin ka sngi saitjain ia ka lympung ïakop ñiah kali ha ki lynti kiba khohruh khohram bad ki lum ki wah bad ka surok ktieh bala tip kum ka 4th edition 4×4 AHOR Off-road Challenges 2022.
Kane ka lympung ka dei kaba la pynlong arsngi kynthih ha Kharsati Park, Umtham bad la pynhap pyrda ia ka da u Myntri Sorkar ka Jylla Bah Kyrmen Shylla.
Haduh 36 ngut ki nongniah kali kynthup lai ngut ki kynthei, kila wan iashimbynta ha kane ka jingiakop niah kali bala pynlong ha ki arbynta-ka Stock Category bala iashimbynta da 27 ngut kynthup ki kynthei bad ka Modified Category bala iashim bynta da 9 ngut.
Ha ka jingiakop jong ka Stock Category, u Bah Banlamphang Marbah ula ioh rah ia ka nam lahduh katba uba wan ba-ar u dei u Bah Sunny B Nongrum bad uba lai u dei u Bah Daiaineh Paliar.
Ha ka jingiakop jong ki kynthei ka Kong Chelsea Byrsat kala ioh rah ia ka nam lahduh bud sa ka kong Effie Pajat ha ka kyrdan kaba ar bad ka kong Lambhadaka Patlong ha ka kyrdan kaba lai.
Ha ka Modified Category, u Bah Mandilost Nongbri ula ioh ia ka nam lahduh bud sa u Bah Ralph Lyngdoh Nongpiur uba wan ba-ar bad u Bah Sandy Cliff Marbaniang uba wan ha ka kyrdan ba lai.
