Shillong, Nailar 14: Ka Meghalaya ka la pynjari dakaba khang mardor ïa ka jingdie, jingbuh bad jingpynpoi ïa ki jingdih ‘Sting’ ha baroh kawei ka Jylla haba kdew ïa ka jingma ha ka koit ka khiah jong ki paidbah bad ka jingkynnoh bym bud ryntih ia ka jingthoh bad ki kyndon ba hap bud.
Ka hukum ba la pynmih da u Dr Joram Beda, Commissioner jong ka Food Safety, Meghalaya, ka bthah ïa baroh ki distributor, wholesaler, retailer, ki dukan madan, ki mongbuh stock bad ki rynsan khaii online- ba kin sangeh mardor ban die, buh pyninam ha ki dukan, buh stock ne sam ia ki sting ha kano kano ka dur.
Ka tnad jong ka koit ka khiah ka la ong ba kane ka jingleh ka dei ka jingpynbud ïa ki jingsngewkhia halor ka koit ka khiah bad ki jingpynpaw ha kaba ïadei bad ka jingma kiba lah ban mih bad ka jingbud ryntih haba thoh iaka jingdon caffeine.
Ka hukum ka pynpaw ruh ïa ka jinglah ban ïoh bad pyndonkam ïa une jait jingdih daki khynnah skul bad ki samla, da kaba ong ba ym shym la don ka jingpynshisha kaba biang ïa ka jingdon jong ka caffeine.
Ka Sorkar ka la hukum ia ki bala pyllang lypa (stock) ia une jait jingdih ‘Sting’ ban pyniakhlad ia ki mar ba la don lypa bad ban pynneh ia ki jingthoh ba pura ha une u jait jingdih.
La khang ruh ïa ki ban pynkynriah ne buhrieh ïa u jingdih Sting khlem ka jingbit naka Food Safety Administration.
Kiba pynkhein ki lah ban shah pynshitom katkum ki kyndon 55 bad 57 jong ka Food Safety and Standards Act, 2006 ryngkat bad kiwei ki kyndon ain.
Kaba kongsan ka long ba ka hukum ka long kaba shipor, kaba dang ap ia ka jingpeit bniah ha ka Laboratory. Kan dang treikam ha baroh ki district tad haduh ban da pynmih ïa ki hukum hadien ba la bishar bniah ïa ki kaiphod jong ki laboratory.
Kane ka hukum kaba la pynmih hapoh ka Food Safety and Standards Act bad kan treikam mardor naduh ka por bad ka tarik ba la pynmih ïa ka ha ka 14 tarik Naiwieng 2026.
