Shillong, Nailar 12: Ka United Democratic Party (UDP) ka la kyntu ia ka Sorkar Pdeng ban pynkylla ia ka ain Mines and Minerals (Development and Regulation) Act, 1957 bad ban sdang biang ia ka jingtih dewiong ha Meghalaya.
Ïa kane ka mat, ka UDP ka rah haka jingleit ka kynhun ba la ïalam da u Myntri Sorkar ka u Bah Lahkmen Rymbui ha ka jingïakynduh ia u Myntri ka tnat kam pohïing ka Sorkar Pdeng u Amit Shah ha New Delhi.
Haba kren sha ki lad pathai khubor, u Bah Lahkmen u la ong ba ka jingtih dewiong ha ka Jylla ka la sahkut naduh ka hukum jong ka Iingbishar ha u snem 2014, kaba ktah ia ki lak ngut kiba kamai jakpoh naka kam tih dewiong.
“Naduh u snem 1970 ngi la leh ia ka kam tih dewiong ha ka Jylla jong ngi, bad haduh u snem 2014 ka la iaid beit iaid ryntih. Hynrei kynsan kynsan, namar ka jingpynmih hukum jong ki bor ba dei khmih, ka la ktah bad kala pynsangeh ia ka kamai kajih jong ki briew ha ka Jylla jong ngi” la ong u Bah Lahkmen.
U la kdew ba naduh u snem 2018, ka Sorkar ba la ialam da u Conrad Sangma ka la pynbor ban pynkylla ia ka ain MMDR ban pyni ia ka rukom long trai jaka jong ka Meghalaya, ha kaba ki riew shimet kidei ki trai khyndew.
“Ngi la kyntu ba dei ban pynkylla ia ka ain MMDR, 1957, da kaba shim khia ia ka jinglong jong ka jinglong trai jaka jong ngi,” la ong u Bah Lahkmen bad bynrap ba ka jingtih dewiong daka Open Cast Mining kam long hapoh ka Jylla namar ki Seam dewiong ki long tang 1-2 phut haba ianujor bad 7-8 phut shawei pat.
Da kaba kdew ia u Prof GG Swell, u la ong ba ia ka jingtih dewiong kham mynshwa ha Meghalaya la ju khein kum ka Cottage Industry.
“Kumta, ki dang iakren ban pynkylla ia ka ain khnang ba wat u briew uba don jaka ruh un lah ban tih dewiong,” u la bynrap.
U Bah Lahkmen ula iathuh ba u Amit Shah u la pynthikna ba yn sa thaw ia ka Committee ban eksamin ia katei ka kam.
Ka UDP ka la kyntu ruh ia ka Sorkar Pdeng ban burom ia ka jingsngew jong ki paidbah ka Jylla Meghalaya halor ka kam jingtih Uranium.
 ka la kyntu ia ka Sorkar Pdeng ban pynkylla ia ka ain Mines and Minerals (Development and Regulation) Act, 1957 bad ban sdang biang ia ka jingtih dewiong ha Meghalaya.){kind=link}