Nongpoh, Nailar 12: Ka kam thaiñ jaiñ tynrai ha Ri-Bhoi ka la ïoh sa kawei ka jingkyrshan lyngba ka jingplie paidbah ïa ka Mawlong Nongtluh Weaving Center ha shnong Mawlong Nongtluh mynta ka sngi.
Ïa kane ka jaka ai jinghikai kam thaiñ jaiñ la wan plie da u Myntri ka tnad Textile Bah Metbah Lyngdoh, ha ka jingdonlang u MLA ka Nongpoh, Bah Mayralborn Syiem, E. Marak, Assistant Commissioner Ri-Bhoi, Bah Wanlam Kupar Kharmudai, Deputy Project Manager, MBMA bad kiwei kiwei.
Ka Mawlong Nongtluh Weaving Center ka dei kawei na ki projek ban ai jingkyrshan bad pynkupbor ïa ki nongthaiñ jaiñ ha katei ka thaiñ. Ïa ka center la tei da ka jinglut kaba kot sha ka T.1.17 klur, lyngba ka Meghalaya Basin Management Agency (MBMA), Ri-Bhoi District.
Haba kren ha ka jingïalang, u Bah Metbah Lyngdoh, u la ong ba ka jingplie ïa kane ka Weaving Center ka long shi bynta jong ka jingthmu ka Sorkar Jylla ban pynkupbor ïa ki nongthaiñ jaiñ bad ban ïada bad pynneh ïa ki rukom thaiñ jaiñ tynrai jong ka jylla.
U la pynpaw ruh ïa ka jingsngewkmen ba u ïoh ïa ka bynta ban peit ïa ka tnad Textile, kaba don ka bynta kaba kongsan ha ka jingïada bad pynneh ïa ka dustur bad ka jinglong tynrai lyngba ki kam thaiñ jaiñ bad kiwei ki kam.
U Myntri u la khmih lynti ba kane ka center kan ym long tang ka jaka ai jinghikai, hynrei kan long ruh ka jaka ban pynïasoh ïa ki nongthaiñ bad ki lad jingïarap bapher bapher, naduh ka jingai jinghikai thaiñ jaiñ, ka jingpynïoh ïa ki tiar bad mar kiba donkam, haduh kiwei ki lad ban kyntiew ïa ki thaiñ jaiñ.
Ka jingplie ïa ka Mawlong Nongtluh Weaving Center ka long kumta kawei ka sienjam ban pynïar ïa ki lad kamai bad ban kyntiew ïa ka kam thaiñ jaiñ tynrai, khamtam ïa ki longïing bad ki nongshong shnong jong ka thaiñ Mawlong Nongtluh bad ki sawdong sawkun.
