Shillong, Nailar 11 : Ka kynhun ki nongialam ka UDP hapoh ka jingialam u Myntri Sorkar Bah Lahkmen Rymbui, kala iakynduh ia u Myntri kam Pohiing ka Ri Amit Shah ha New Delhi ha ka sngi Ba-ar, ban pnsngew ia ki jingsngewkhia halor ka Amendment Bill ka Foreign Contribution Regulation Act.
Haba pyntip ia kane, u President ka UDP Bah Metbah Lyngdoh ula iathuh ba kane ka jingialang kala pynleit jingmut eh ba kumno kane ka jingpynkylla ia ka FCRA kan ktah ia ki jaka treikam bapher bapher ha Meghalaya.
“Ki mat bala iakren bad u Myntri kam Pohiing ka dei eh halor ka FCRA” ula ong.
Haba kylli ia ka jingiakren ia kiwei pat ki mat, u Bah Metbah ula ong ba ka kynhun ka lah ban shim ia kane ka kabu ban pynsngew ia kiwei pat ki jingeh bad jingdonkam ka Jylla.
“Kum ka party, lehse kila iakren ia kiwei pat ki mat ba kongsan ka Jylla ha kane ka jingiakynduh” ula ong.
Kane ka jingialang ka dei ka jingpynbud ia ka jingkyrpad ba dang shen jong ka UDP ban pyrkhat biang ia ki kyndon kiba donkam jong ka Foreign Contribution Regulation Amendment Act bad Rules, 2026, kaba ka party ka ong ba ka lah ban ktah ia ka jingiarap para briew, ka pule puthi, ka koit ka khiah bad ka kam shakri ia ka imlang sahlang hapoh ka Jylla.
Ha ka kyrwoh ba pynmih dang shen, ka UDP kala ong ba ka kyrshan ia ki jingsngewkhia bala pynsngew da ki nongialam niam bad u Myntri Rangbah ka Jylla.
