Shillong, Nailar 11: Kum ka jingkyntiew ïa ka kamai kajih haki thain nongkyndong, 35 ngut ki nongrep kait na North Garo Hills ki la lum lang 15 metric ton ka kait ban die ha u nongkhaii ha Patna, kaba dei ruh ka sien ba nyngkong ba la khaii iaka kait napoh ka District shabar ka jylla.
Ia kane ka jingkhaii kait la phah lyngba ka DijakoAgro Producer Company Limited, ryngkat ka jingkyrshan na ka Meghalaya New and Renewable Energy Development Agency (MNREDA).
Ia ki kait la die sha ka Himalaya Traders, Patna ba la seng khnang ban ai ka lad ia ki nongrep ban iateh kular kaba kham janai bad ban plie lad ba kin ioh ia ki iew kiba kham heh.
Ka jingai jingmut na ki nongthied la khmih lynti ba kan pynbha ïa ka jingthied ha ka lawei, ka jingbuh dor bad ki jinglong jingman jong ki nongrep ha ka thaiñ.
Ki heh ophisar ki la ong ba kane ka jingthmu ka pyni kumno ka jingïalang kaba la pynbeit ryntih bad ka jingpynïadei bad ka ïew ka hat ka lah ban pynduna ïa ka jinghiar dor ki mar ha ka por ba jur bha soi bha ka kait bad ban ai ïa ki nongrep ïa ka jingtip ha ka por kaba biang shaphang ka jingdawa ïa ki jait mar rep.
Da kaba pyniadei ia ka jinglum bad ka jingshalan iaki mar bad ka jingpyniasoh ia ki iew ki hat, ka DijakoAgro ka la don ka bynta kaba kongsan ha kaba pyniasoh ia ki nongrep bad ki jaka kiba thied iaki mar rep.
Ka MNREDA ka la kdew ba ka jingshalan ia ki mar ba nyngkong ka dei ka sienjam kaba kongsan ha kaba pynkhlain ia ka dor jong ka kait na North Garo Hills, bad ka la pynskhem biang ia ka jingkular jong ka ia ki lad jingiarap kiba iadei bad ka pynpoi iaki mar rep shaki iew kiba heh naka bynta nongrep na kylleng ka Jylla Meghalaya.
