Shillong, August 11: Ki bor pyniaid elekshon ka jylla Meghalaya ki lah dep ban ithuh ia ki 6,51,644 ngut ki nongthep vote ia ka jingdonkam ban shah khmih bniah shuh shuh ha ka Special Intensive Revision (SIR) ka Electoral Roll, ha kaba u Chief Electoral Officer ula bthah ia ki bor pynaiid ban pynthikna ba kin iaid bad ban pyndep ia ka rukom treikam hashwa ba kin shim ia kano kano ka rai.
Kane ka kynthup ia ki 2,22,786 ngut ki nongthep vote kiba la shah pynhap ha ka kyrdan “No Mapping” bad 4,28,858 tylli ki jingjia kiba don ia ki jingduna ha ka Mapping bad ki rekod jong ka SIR kaba lah dep.
Ha ka jingialang jong ka Review Meeting kaba la pynlong da u Chief Electoral Officer la wan ban iashimbynta da ki Deputy Commissioner/District Election Officer, Electoral Registration Officer bad kiwei kiwei ki heh ophisar ka tnad Election kaba la long hynne ka sngi Baar.
Ki jingduna kiba la pynpaw lyngba ka jingleh ia ka ECINET ki kynthup ia ka jingbym iadei ka kyrteng ki nongthep vote ne ka kyrteng jong ki kmie ki kpa, ka jingbym ia hap ka rta ne ka jingiapher hapdeng ki nongthep vote bad ki kmie ki kpa, ka jingiapher ka rta hapdeng jong ki shipara kiba dei na kijuh ki kmie ki kpa, palat 6 ngut ki khun kiba dei na kijuh ki kmie ki kpa bad katto katne ki jingbakla ha ka rta kaba kynthup ia ki kparad abd meirad.
U CEO ula bthah ia ki ERO bad AERO ban khmih bniah bha ia kine ki jingjia bad ban pynthikna ba dei ban phah da ka notis bad ban pynlong ia ka Hearing ha ka rukom kaba dei. Ki nongthep vote kiba ioh pdiang ia ki notis kin ioh ia ka lad ban leit mih dalade hakhmat jong ki ERO/AERO bad ban aiti ia ki kot ki sla kiba kongsan.
Ka Draft Electoral Roll na ka bynta baroh ki 60 tylli ki Assembly Constituency kadei kaba la dep ban pynmih ha ka 5 tarik u Nailar. Ka por ban phah ia ka jingkam ne jingkyntait ne ka Claims and Objections kan long haduh ka 4 tarik u Nailur, katba ki jingai notis bad ki Hearing kin dang iai bteng haduh ka 3 tarik u Risaw. Ia ka Electoral Roll kaba pura yn sa pynmih ha ka 7 tarik u Risaw.
Naduh ba la pynmih ia ka draft electoral roll, ki bor pyniaid elekshon kila ioh pdiang 2,449 tylli ki aplikeshon kiba kynthup ia ki 1,121 ha ka Form 6, 8 tylli ha ka Form 7, 253 tylli ka Form 8 halor ka jingkynriah ki jaka sah bad 1,067 kiwei pat lyngba ka aplikeshon lyngba ka Form 8.
U CEO ula lum ruh sa ia kawei ka jingialang bad ki nongmihkhmat jong ki seng sain pyrthei ka ri bad jylla kiba la ioh jingithuh bad la kyntu ia ki ba kin bteng ban iatreilang lyngba ki Booth Level Agent ban iarap ia ki nongthep vote kiba dei hok ban pynthikna ia ki kyrteng ki jongki bad ruh ban ujor lyngba ka Claims or Objections haba donkam.
Kan ym don kano kano ka jingpynduh pyndam khlem da bud rytnih bhai a ki kyndon treikam.
Ka Tnad Election kala pynpaw ba kano kano ka kyrteng kaba mih ha ka Draft Electoral Roll kan ym shah weng ne shah pyndam noh khlem da iaid katkum ki kyndon treikam. Ki ERO/AERO kiba dei khmih kidei ban ai ia ki notis, pynlong ia ka jingtohkit, ban ailad ia ki nongthep vote bad ban pynmih ia ka hukum kaba don nongrim hashwa ban shim ia kano kano ka rai.
Uno uno u nongthep vote u bym sngewiahap bad ka rai jong u ERO u lah ban ujor sha ki District Magistrate hapoh jong ka 15 sngi. Nalor kane lah ruh ban ujor shuh shuh sha u Chief Electoral Officer hapoh jong ka 30 sngi jong ka jingpynmih hukum jong u District Magistrate.
U CEO ula kyntu ia baroh ki nongthep vote kiba dei hok ba kin khmih bniah ia ki kyrteng ki jongki bad kiwei kiwei ha ka draft electoral roll bad ban ujor da ka claims or objections hapoh ka por kaba la buh ha ka jaka ban shu ap sah haduh ban da kut noh ka por.
 ka Electoral Roll, ha kaba u Chief Electoral Officer ula bthah ia ki bor pynaiid ban pynthikna ba kin iaid bad ban pyndep ia ka rukom treikam hashwa ba kin shim ia kano kano ka rai.){kind=link}