Guwahati, Risaw 09 :U Myntri kam pohiing ka sorkar pdeng u Amit Shah ula pynlong ka jingialang bad ki Myntri rangbah (CM), ki Chief Secretary bad ki Director General of Police jong baroh ki jylla ka thain shatei lammihngi (North Eastern States) ha ka ba iadei bad ki kam khaii drok bad halor ki kam shongshngain hapoh ka ri ha ka nongbah Guwahati, Assam hynnin ka sngi Saitjain.
Na ka liang ka Tnat kam pohiing ka la ban jur na ka bynta ban pynurlong ia ka jingiohi jong u Myntri Rangbahduh (PM) Narendra Modi ban pynlong ia ka India kaba lait na u drok.
Haduh kumba 40,000 kilo u drok la pynjulor noh ha ka thain Northeast lyngba ki jingialang pyrshah drok ba kyrpang. Ha ka jingshisha la buh ia ka thong ban pynjulor kumba 75,000 kilo u drok, hynrei hapoh ka jingialam jong u PM Modi la lah ban pynjulor haduh 1.5 lak u drok kay haduh mynta, kata kaba la jan kot sha ka arshah na ka thong ba la buh.
Ha ka jingialang, u Amit Shah ula ong ba ka jingsaphriang ki kam khaii drok kala ktah jur ia ka imlang ka sahlang. Ki jingjulor lyngba kino kino ki kam pyntriem jong ki lehnoh ki dang long khyndiat eh, hynrei ka jingsaphriang jong u drok hapoh ka imlang sahlang ka pynjot ia ka lawei. Ula ong ruh ba lyngba ka “Azadi ka Amrit Mahotsav ” na ka liang ka tnat kam pohiing ka ban jur na ka bynta ban pynurlong ia ka jingiohi jong u PM Modi ban pyllait ia ka Ri India na u drok.
U Shah ula ong ruh ba ka sorkar India hapoh ka jingialam jong u PM Modi ka la shim ia ki sienjam bym don jingmab ban thwet bad pynpulom ia kino kino ki jingpyrshang lyngba ka pisa beain na ki kam khaii drok bad lyngba ki kynhun mafia kiba thmu ban pyntroin ia ka ioh ka kot bad ia ki kam shongshngain hapoj ka ri.
Lyngba ki jingbthah jong u PM Modi, ka tnat kam pohiing kala pyntreikam ia ki laitylli ki mat ban pynkhlain ia ki jingtreikam ha kane ka thma pyrshah drok, kata lyngba ka jingpynkhlain ia ki rukom treikam, ka jingaibor bad iatreilang jong baroh ki tnat iakhun pyrshah drok bad lyngba ki jingialap bad pynshai paidbah ban tehlakam ia ki kam drok.
Nalor kata u Shah ula ong ruh ba baroh ki jylla ki dei ban don kawei ka Forensic Science Laboratory bad na ka liang ka sorkar India kalong kaba kloi ban aisa ia ka jingiarap pisa kaba 50 % ha kaba iadei bad kane ka bynta.
Ha kawei pat ka bynta, ia ka Regional Office jong ka NCB la pyntreikam ha Guwahati, bad la sdang ruh ban pyntreikam hapoh Agartala ha Tripura bad ha Pasighat/Lower Siang ha Arunachal Pradesh bad kumjuh ia ka Zonal Office ruh la sdang ha New Jalpaiguri khnang ba kan kdup lang ia ki thain ba marjan jong ka jylla Sikkim.
Shuh shuh utei u Myntri ka sorkar pdeng ula kham noh mynsiem ruh lyngba ka jingpyndonkam da ki drone, artificial intelligence bad satellite mapping na ka bynta ka jingpynithuh bad tehlakam pyrshah ia kiti ki jaka ba la pyndonkam na ka bynta ban rep opium. Ula ong ruh ba ia ki case kiba iadei bad ki kam drok dei ban pynlong ia ka jingtohkit kaba naduh tyllong.
Kila don baroh haduh 1257 tylli ki case ba la rejistar hapdeng u snem 2006-2013 kaba pyni ia ka jingkiew kaba 152 percent sha ka 3172 hapdeng u 2014-2022; baroh kiba la Shah kem ha kiba kum kitei ki por kala kiew da 260 percent sha ka 4888 na ka1362.
Hapdeng ka snem 2006-2013, haduh 1.52 lak kilo u drok la ioh ban kurup, kaba long arshah sha ka 3.30 lak kilo hapdeng ka snem 2014-2022, u drok ba shongdor haduh kumba T. 768 klur la ioh ban kurup hapdeng u snem 2006-2013, kaba la kiew sha ka 25 Shah kata haduh T. 20,000 hapdenh ka snem 2014-2022 hapoh ka thain Northeast.
