Guwahati, Risaw 09: U Myntri kam pohiing ka sorkar pdeng u Amit Shah ha ryngkat u president ka BJP u JP Nadda hynnin ka sngi Saitjain kila plie ia ka ophis ka ba dang shu dep tei thymmai jong ka party ha Beltola, Guwahati bad aijingkren ruh ha ka rally hapdeng ki nongtrei jong ka party.
Nalor kata kine ki nongialam kila aijingkren ruh ha ka rally paidbah ne karyakarta rally ha ka nongbah Guwahati.
U Nadda ula mih noh na kane ka jylla hadien katei ka rally, katba u Shah u dang bteng ban pynlong jingialang ha ka ba iadei bad ki kam droks bad ki myntri rangbah, ki chief secretary bad director-generals of police jong ki jylla ka thain shatei lammihngi (Northeast).
Une u Myntri ka sorkar pdeng uba la pynlong ka jingwan jngoh kaba lai sngi kynthih ia ka Assam naduh ka sngi Thohdieng ba la lah ula pynlong ruh ia ka jingialang bishar bniah ha ka ba iadei bad ka North Eastern Space Application Centre (NESAC) ha ka por janmiet.
