Imphal, Nailar 7: Ka sorkar Manipur ka la pynsngew sha ka Sorkar Pdeng ia ka jingkwah ban leh ia ka National Register of Citizens (NRC) hapoh ka riti synshar bad ka ain, ong u Myntri kam poh iing ka jylla u Konthoujam Govindas ha ka sngi Thohdieng.
U Govindas u la pynpaw ïa kane haba plie ïa ka jingïalang ai jingmut kaba ar sngi halor ka jinglong jingman jong ki briew ha Manipur, katba ki jingdawa ki nang kiew na ka bynta ban pynthymmai ïa ka NRC shwa ka jingtyrwa ïa ka khana samari 2027.
“Ka sorkar Manipur ka la pynsngew sha ka sorkar pdeng ïa ka jingkwah jong ka ban pynlong ïa ka National Register of Citizens (NRC) hapoh ka riti synshar ka ri bad ka aiñ,” ong u Govindas.
U la ong ba ka Ministry of Home Affairs ka la thaw kham mynshwa ia ka high-level committee ban bishar bniah ia ki mat kiba iadei bad ka jingkylla ha ka jingbun briew ha ka ri.
U Myntri Rangbah ka Jylla, u Yumnam Khemchand Singh, uba la ai jingkren ruh ha katei ka jingïamir jingmut, u la ong ba ka jingïada ïa ka jinglong kyrpang jong ka Manipur, ka khyndew ka shyiap, ka kolshor bad ki jingmyntoi jong ki paidbah jong ka, ka dang long ka jingthmu ba kongsan jong ka sorkar jong u.
“Ka Manipur ka la thait.Ki pakhang shnong bad ki jait jingiakhih bapher bapher ki la ktah ia ka ioh ka kot jong ka jylla.Kum kine ki jingiakhih ka kath shisha ia ki nongbylla sngi”, la ong u Singh.
U la kdew ruh ïa ki jingeh ba ki nongñiah trok kiba sahkut ha ki surok bah jong ka ri ki ïakynduh haba ki kit ïa ki marbam ba kongsan sha ka jylla hapdeng ka jingkhang khyrdep kaba dang ïaid shakhmat.
U Singh u la ong ba ka sorkar ka long kaba kloi ban kyrshan ia kano kano ka sienjam kaba ai jingmyntoi ia ki paidbah bad pynpaw ia ka jingkyrmen ba ka jingiakren kaba ar sngi kan pynmih ia ki jingai jingmut kiba tei.U la ban jur ba kino kino ki jingai jingmut ki dei ban sah hapoh ki kyndon jong ka riti synshar ka ri.
Ha ka jingthoh ha ka social media kaba hadien, u myntri rangbah u la ong, “Ka jingïada ïa ka jinglong kyrpang, ka khyndew ka shyiap, ka kolshor bad ki jingmyntoi jong ki briew jong ngi ka Manipur ka dang long ka jingthmu ba ha khmat eh jong ka sorkar jong ngi.”
Kane ka jingïamir jingmut ka wan hapdeng ka jingdawa kaba jur na ki seng bhalang ba dei ban pynthymmai ïa ka NRC shwa ban pynlong ïa ka Census.Katto katne ki kynhun ki la kynthoh ba ki jingkylla ha ka jingbun briew bad ka jingkynnoh ba ki wan buhai shnong be-aiñ ki donkam ban pynbeit shwa ka jingkheiñ briew kaba hadien.
Ka sorkar jylla ka la wanrah lang ïa ki riewstad, ki riew shemphang ha ka aiñ, ki nongthoh histori, ki seng bhalang, ki kynhun kynthei bad kiwei kiwei ki nongïashim bynta na ka bynta ka jingïamir jingmut kaba ar sngi halor ki mat jingkheiñ briew bad ka khana samari 2027.
La khmih lynti ba kane ka jinghikai kan iakren ia ka jinglong jingman jong ka jingbun briew, ka jingthmu ban khein briew, ka jingpynthymmai ia ka NRC bad ki mat polisi kiba iadei bad kane.Ki jingai jingmut kiba mih na ka jingïamir jingmut ki lah ban pyntip ïa ka rukom treikam jong ka sorkar jylla ha kaba ïadei bad ka jingpynïaid ïa ka jingbun briew bad ka jingpynkhreh na ka bynta ka khana samari 2027.
Ka rai jong ka sorkar ban pynlong ïa ka jingïamir jingmut bad ka jingpynpaw jong ka ba ka kwah ban pyniaid sha khmat ïa ka NRC hapoh ka riti synshar ka long ka dak jong ka sienjam kaba kongsan ha ka jingïakren kaba dang sahkut ha ka saiñ hima sima ha Manipur.
 hapoh ka riti synshar bad ka ain, ong u Myntri kam poh iing ka jylla u Konthoujam Govindas ha ka sngi Thohdieng.){kind=link}