Maham ka HSPDP ba buh jingma ka FCRA Bill ia ki skul, hospital ha Jylla

Shillong, Nailar 06: Ka Hill State People’s Democratic Party (HSPDP) state youth wing ka la pynpaw ia ka jingpyrshah kaba jur ia ka Foreign Contribution (Regulation) Amendment Bill, 2026, da kaba ong ba kane la Bill ka dei ka jingma ia ka jingsynshar laitluid jong ki Balang, ki skul, ki hospital bad kiwei kiwei ki shlem ai jingiarap ha Meghalaya.

Ha ka kyrwoh ba la pyllait da u President samla Korbarlang Syiemlieh, u la ong ba ka Sorkar Pdeng ka thmu ban wanrah ia kane ka Bill ha ka dorbar jong ka Parliament ban long mynta u bnai Nailar 2026.

Ka la kyntu ia ka Sorkar Pdeng ban phah shwa sha ka Joint Parliamentary Committee hashwa ban ai jingmynjur kyrkieh.

Ka la ong ba ïa ka pule puthi bad ka koit ka khiah ha Meghalaya la tei bad kyntiew daki kynhun niam naduh ki shispah snem mynshwa.

“Kano kano ka ain kaba lah ban ktah jur ia ka jingtreikam bad jingdon jong kine ki jaka treikam kam dei tang ka jingsngewkhia jong ki seng niam hynrei ka dei ka mat kaba ktah ia ka jingmyntoi paidbah hapoh ka Jylla” kala ong.

Katba ki kyrshan ia ka jingdonkam ban khui bad shai ha ka jingioh pisa nabar ri, ka HSPDP ka pynpaw ia ki bor kiba phylla bad ki bym iahap ha ka Bill.

Ka la pyrshah ia ka kyndon kaba ailad ia ka Bor ba la thung da ka Sorkar ban shimti ia ki jingdon jingem jong kano kano ka kynhun niam ha kaba ka jingpynrung kyrteng hapoh ka FCRA ka la kut noh, la weng noh, lane ym shym la pynthymmai.

“Ki jaka pule ba la tei ha ki katto katne phew snem ki lah ban long kiba don jingkitkhlieh ha ka jingsynshar jong ka Sorkar tang namar ka jingbym pynthymmai jong ki kyndon” kala maham.

Ka la bynrap ba wat ki jingdon jingem kiba la bei tyngka da ki jingai sngewbha jong ki nongshong shnong ki lah ban wan hapoh ka jingpyniaid jong ka Sorkar.

Ka la pynpaw ruh ïa ki jingsngewkhia halor ka “jingpynsangeh” ïa ki laisen FCRA bad ka jingbym don ka lad ban ujor ne ka jingbishar kaba biang shwa ban leh ïa kum kane ka jingleh.

“Ka jingbym don ki lad jingïada ha ka rukom treikam, ka pynmih ïa ki jingeh ba kongsan ha kaba ïadei bad ka hok bad ka jinglong hok ha ka rukom treikam,” ka la ong.

Ka HSPDP ki la kynthoh ïa ki kyndon ban khang kiba khlem shai halor ka “jingpynkylla niam” bad ki la ong ba kane ka Bill ka lah ban ktah ïa ki hok jong ka riti synshar katkum ki kyndon 25, 26, 29 bad 30.”

Ia kane ka Bill dei ban phah shwa sha ka Joint Parliamentary Committee ban eksamin bniah,” la ong ka HSPDP da kaba kyntu ia ka Sorkar Meghalaya ban rah ia kane ka kam sha ka Sorkar Pdeng.