Shillong, Nailar 06 : Ka Tnad Urban Affairs ka Jylla kala phah ia ka jubab sa ka Khasi Students’ Union (KSU)-Shillong Mihngi Circle, ba pyntip ba ka la dep pan jingshai na u Deputy Inspector General (DIG) ka Central Bureau of Investigation (CBI) halor ka jingkynnoh ba shna mandir ha phyllaw ka Ophis CBI ba don ha Mawdiangdiang.
Ia kane ka shithi la phah da ka New Shillong Township Development Agency (NSTDA) haba pyntip ruh ba kane ka jaka ba don ka Ophis ka CBI ka dei ka jaka Sorkar (Revenue Land) kaba la aiwai sha ka CBI kat kum ka lease agreement bala soi ha ka 14 tarik Naiwieng 2018.
Kat kum ka shithi la kren shai ba ka jaka ba aiwai sha ka CBI ka long beit thik tang ban buh ia ka Ophis bad ki jaka sah ki nongtrei. La ong ba ka clause 10 jong ka soskular la kren shai ba ki nongshim wai kim dei ban tei ia kano kano ka jingtei lane pynkylla ia ki jingtei bala don lypa khlem da ioh shuwa ia ka jingmynjur na ka NSTDA.
Ia kane ka shithi la aiti sha ka KSU ha ka 6 tarik Nailar, 2026, kum ka jingpyntip ia ki sienjam ba ka NSTDA kala shim halor ka jingujor ka seng.
“Kane ka shithi ka dei kaba kongsan ha ka jingiakhun ka seng ban pynskhem ba baroh kiba pyndonkam ia ki jaka Sorkar, kynthup ki shlem jong ka Sorkar pdeng, ki dei ban bud ryntih ia ka ain bad ia ki kyndon jong ka jingiateh soskular” ong ka KSU.
Ka KSU ka ngeit skhem ba ka Sorkar bad ki bor ba dei peit, kin bishar bniah ia ka lease agreement bad kin shim ia ki sienjam ba donkam kat kum ka sain.
Ka KSU ka dawa ruh ba lada lap ba katei ka jingtei ka la pynkheiñ ïa ki kyndon jong ka jingïateh soskular, dei ban pynpra noh ïa ka katkum ka aiñ.
“Namarkata, Ka KSU-Shillong Mihngi Cirlce, ka kyntu ïa ki bor ba dei peit ba kin pynlong ïa ka jingtohkit kaba hok, kaba khuid bad kaba kloi halor kane ka kam, bad ban shim ïa ki sienjam katkum ka aiñ bad katkum ki kyndon jong ka lease agreement” kala ong haba bynrap “Ym dei ban don mano mano ne kano kano ka shlem kaba lait na ka jingbud ïa ka aiñ bad ïa ki kyndon kiba synshar ïa ka jingpyndonkam ïa ki jaka Sorkar”.
Ka KSU-Shillong Mihngi Circle ka pynshai ruh ba ka nongrim jong kane ka jingïakhun kam dei satia pyrshah ïa kano kano ka niam ne ïa kano kano ka jaitbynriew bad ong “Ka nongrim jong ka Seng ka long ban ïada ïa ka hok bad ka jingïaid beit jong ka aiñ, bad ban pynthikna ba ym don mano mano, khamtam ki briew kiba wan nabar, kiba lah ban kam trai ne leh trai khlieh ïa ki jaka paidbah ne ki Revenue Land da kaba pynkheiñ ïa ki aiñ bad ki kyndon kiba treikam”.
