Shillong, Nailar 05 : U Myntri Rangbah ka Jylla Conrad K Sangma ha ka sngi Balang ula ong ba ka Sorkar ka dang wadbniah ia ki daw ka jingshlei um ha Jorabat bad dang iakren bad u Deputy Commissioner ban lap ia ki lynti ba lah ban pynbeit mardor bad kiba neh shirta.
“Hooid, ngi dang wad bniah ia baroh ki bynta bad ngi la phaikhmat sha kino kino ki lad kiba ngi lah ban leh” ong u Conrad.
Ula pynpaw ba ka jingshna surok, khamtam ka bynta ba shakhrum jong ka flyover, ka lah ban dei ka daw ba pynlang ia ka um bad shlei um kloi bha.
“Ka don ka jingtei hangtei namar ka jingshna surok. Ka jaka ba hakhrum ka flyover ka don kumba shiphut shapoh, kaba pynlong ia ka um ban lang hangtei” ula ong.
“Ki lah ruh ban don kiwei ki daw. Kum ka Sorkar, ngi hap ban khmih ia ki lynti ban pynduna ia ka jing shah ktah u paidbah. Ngi don ka jingsngewkhia ia kane, ka dei ka mat kaba kongsan ia ngi” bynrap u CM.
