Shillong, Nailar 5: Ka Sorkar Jylla kan sa lum ia ka jingialang jong baroh ki tnad sorkar mynta u bnai ban iatai sani halor ka jingsahteng jong ka mat ban pynkynriah ia kiba sah ha Them Iew Mawlong, ong u Symbud Myntri Rangbah ka Jylla uba khmih ia ka Urban Affairs u Bah Sniawbhalang Dhar hynne ka sngi Balang.
Haba iakren bad ki nongthoh khubor, u Bah Dhar ula ong, ba lah dep ban bthah ia ki ophisar ba kin ai ia ki jingpyntip bad ki kaiphod na baroh ki tnad sorkar kiba dei khmih hashwa ban long katei ka jingialang.
“Ngi lah long kiba la pynkhreh ban pynlong ia ka jingialang, lehse ha ka taiew kaba khatduh jong une u bnai. Nga lah dep ban iakren pynbeit bad ki ophisar na ka tnad ba kin ai ia ki jingtip kiba bniah bad ia ki kaiphod ba dang shen ba ki tnad sorkar ki bapher bapher” ong u Bah Dhar.
“Ngin sa don ia ka jingialang ban iatai sani bha halor katei ka mat ha ka taiew ba khatduh jong u Naialr” ula bynrap.
Haba kylli la ka Harijan Panchayat Committee ruh kan donlang ha katei ka jingialang kaba nyngkong, u Symbud Myntri Rangbah ula ong ba katei ka jingialang kan dei thik tang na ka bynta ki tnad sorkar.
“Ka jingialang kan long shwa tang hapdeng jong ki tnad sorkar bad ngin sa khot ruh ia ki briew na ka liang ka jingki” ong u Bah Dhar.
Ula ong, ba ka sorkar ka dang ialeh ban ioh ia ka kaiphod kaba pura kaban kynthup ha baroh ki liang jong katei ka mat.
“Ngi ngin sa lum ia baroh ki kaiphod kiba bniah hapoh jong ki tnad sorkar bad ia ka kaiphod hapdeng ki tnad sorkar bad ka Harijan Colony bad ka kaiphod hapdeng ki Harijan, ka Sorkar bad ka Tnad Defence. Kumta, la kumno kumno nga lah dep ong, ia ki ban long kiba la pynkhreh lut nadong shadong. Ha ka taiew ba khatduh jong u Naialr, ngin sa don ia ka jingialang halor katei ka mat” ula ong.
Haba kylli balei ym shim la lah ban pynbeit ia katei ka mat mynta la bun snem, u Bah Dhar ula kubur ba kane ka mat kadei kaba jwat hynrei la shim ia ki lad ban lah ban pynbeit noh ia katei ka kam.
“Hooid, kadei ka mat kaba la sahteng bha hynrei kadei kane kaba ngi lah iai pyrshang. Naduh ba kadei ka mat kaba la sahteng kam long kaba suk hynrei ngi lah pyrshang kat kaba lah ban pynbeit noh” ong u Bah Dhar.
