Shillong, Nailar 04: U nongaibuit ka tnat Social Welfare Bah Paul Lyngdoh u la kyntu ïa ki nongtrei Sorkar ba kin pynkylla ïa ka rukom peit ïa ka jingduna jong ki briew ba duna dkhot met bad ban tei ïa ki jaka treikam kiba kynthup lang da kaba pyndonkam ïa ki kor ki bor ai jingïarap.
Haba kren ha ka prokram pynsngewthuh halor ka “Assistive Technology and Digital Accessibility na ka bynta ki nongtrei Sorkar” ha Secretariat, u Bah Paul ula ban jur ba ka jingkynthup lang ia baroh kynthup ruh iaki ba duna dkhot met kadei ban iaid palat ia ki jingtei.
Haba pynpaw ia ka jingdonkam ban pynkylla ia ka jingsngewthuh shaphang ki briew kiba duna haka bor iohi, u Bah Paul u la ong, “tang ka bor iohi kam lah ban pynthikna ia ka jingiohi jngai ne jinglah jong u briew”
“Ki don bun ki briew kiba don iaka bor iohi ki khmat hynrei kim don ka jingiohi jngai, katba kiwei pat kiba duna bor iohi ki don ka bor ban iohi jngai kaba phylla” u la ong.
U la kyntu ia ki nongtrei Sorkar ba kin shim ia ka rukom treikam kiba kynthup lang bad kiba leh sngewrit ha ki jaka trei jong ki.
Ia ka prokram la pynlong da ka Ophis Commissioner for Persons with Disabilities, ka tnat Social Welfare haka jingiatreilang bad ka Secretariat Administration Department bad ka Trestle Labs Pvt. Ltd., Bengaluru hapoh ka phangpdeng ‘Promoting an Inclusive Workplace for Employees with Visual Impairment’.
U Bah Paul u la ai khublei ïa ki nongpynïaid bad ong ba kane ka jingthmu kan ïarap ïa ka Sorkar Jylla ban tei ïa ka jaka treikam kaba kynthup lang lyngba ka assistive technology bad ka digital accessibility.
U la ïaroh ruh ïa ka jingtrei shitom jong ka ophis Commissioner for Persons with Disabilities, Secretariat Administration Department bad Trestle Labs Pvt. Ltd., Bengaluru.
Ula pynshlur ia ki nongtrei kiba don jingduna ha ki dkhot met ba kim dei ban iohi ia ka jinglong jingman jong ki kum ka jingkhanglad ne ka jingduna.
“Ki nongtrei kiba don jingduna ha ki dkhot met kim dei ban peit ia ka jingduna ha ki dkhot met jong ki kum ka jingkhanglad ne jingduna hynrei ki dei ban ithuh ia ka jinglah jong ki ban noh synniang sha ka imlang sahlang” ula ong.
Ha kane ka sngi, u Bah Paul ula aiti ia ka Kibo assistive technology device shaka Secretariat Administration Department ban ioh pyndonkam hok.
U Secretary ka tnat SAD, u Swapnil Tembe haka jingkren ula pynpaw ïa ki lad ki lynti ba la shim ban pynlong ïa ka Secretariat kaba kham suk haka leit ka wan daka ba kynthup ïa ki Ramp, ka jingpynbha ïa ki jaka leit shabar, bad kiwei kiwei ki lad ki lynti pynsuk ka leit ka wan sha ka Secretariat.
Ha kane ka prokram la wan ïashim bynta da Commissioner for Persons with Disabilities, Lyngkor Kynjing, MCS, Director ka tnat Social Welfare, Saloni Verma, ki ophisar na ki tnat bapher bapher bad kiwei kiwei de.
