Guwahati, Nailar 1: Ka sorkar kmie ka la mynjur ban pyllait lypa ïa ka pisa kaba ₹379.35 klur sha ka jylla Assam hapoh ka State Disaster Response Fund (SDRF) ban kyrshan ïa ki kam ai jingïarap, pyllait im bad pynbha ïa ki jingtei kiba shah pynjulor na ka jingshlei um mynta u snem.
Ia kane ka jingmynjur la ai da u Union Home Minister Amit Shah kum shi bynta jong ka jingiarap kaba kham heh kaba ₹2,117.85 klur na ka bynta ki hynriew tylli ki jylla kiba la shah ktah ha ka jingshlei um ha kane ka por ba dang iaid shakhmat jong ka southwest monsoon.
Katkum ka jingong jong ka Ministry of Home Affairs, la mynjur ia ka Assam ia katei ka pisa kum ka jingpynlait lypa ia ka bhah ba nyngkong jong ka central share jong ka SDRF na ka bynta u snem mang tyngka 2026-27 da kaba pynlait ia ki kot ki sla kiba ju long ban pynthikna ia ka jingdon pisa ha ka por kaba biang.
Ka ministry ka la ong ba ka sorkar kmie ka la buddien bha ia ka jinglong jingman jong ka jingshlei um ha Assam bad ka la pynjlan ia ki jingiarap baroh kiba lah ban ioh, kynthup ia ka jingpynpoi shwa ia ki kynhun National Disaster Response Force (NDRF) bad ka jingkyrshan na ka Ministry of Defence hangno hangno ki jaka ba donkam.
Haba pyni ïa ka jingjur jong ka jingshlei um, ka Centre ka la dep ban phah ïa ar tylli ki Inter-Ministerial Central Team (IMCT) sha Assam ban bishar ïa ka jingheh jong ka jingjulor.La phah ruh ïa ki IMCT ba kyrpang sha Arunachal Pradesh, katba ïa kawei pat ka kynhun dang thaw na ka bynta ka Nagaland hadien ka jingkyrpad na ka sorkar Jylla.
Ka Union Home Ministry ka la ong ba ka sorkar ba la ïalam da u Narendra Modi ka dang ïai bteng ban ai ïa baroh ki jingïarap ba donkam sha ki jylla na ka bynta ki lad jingïarap, jingpyllait im bad pynbha pat kiba treikam bad kan dang ïai bteng ban buddien bha ïa ka jinglong jingman jong ka jingshlei um.
Nalor ka Assam, ka Centre ka la mynjur ₹44.55 klur na ka bynta ka Arunachal Pradesh, ₹500 klur kawei kawei na ka bynta ka Gujarat, Maharashtra bad Odisha, bad ₹193.95 klur na ka bynta ka Himachal Pradesh, kaba pynpoi ïa ka jingïarap ba la ai lypa sha ka 2,117 klur.
