Nongstoin, Nailar 01 : Ki Pulit ka Nongstoin kila pyntip ba dei u pyrsa kurim barim uba suba thombor ia ka longing u Bah Elbin Kharbani bad Seldaris Kharsyntiew ha Porsohsat, kaba lam sha ka jingiap u Bah Elbin na ka jingmynsaw.
Ki iathuh ba une u briew ba leh ia kane ka Kam u kyrteng u Koldongstar Thongni ba 22 Snem ka rta. Ki Pulit kila kem ia u na Iew Nongstoin ha ka miet 31 Tarik Naitung.
u Superintendent of Police ka West Khasi Hills District bah H.P Kharkongor, u la ong ba ia utei u suba don kti la kem na Khlieh Ïew Nongstoiñ, hadien ka jingkhynra kaba jur da ki pulit ka Nongstoiñ ryngkat ka jingïarap jong ki dkhot ka VPDCNA.
U SP u iathuh ba ha ka jingtohkit, u Koldingstar Thongni u la phla ba u la ot shwa ïa ka bording elektrik ha katei ka ïing shwa ban rung jubor, bad ula thombor ïa kitei ki ar ngut shi kurim kiba dei ki kthaw bad kiar barim jong u, ha ka por ba ki dang thiah.
U iathuh ba hadien katei ka jingthombor, la iathuh ba utei u briew u la ïalam ïa ka khun khatduh jong kitei ki arngut sha kawei ka khlaw kaba don ha ka shnong Syllei – ïawkheiñ kaba don marjan bad ka shnong Mawrok Porsohsat.
Hynrei ha ka por kumba 3:00 baje janmiet jong ka 31 tarik u Naitung katei ka samla ba 18 snem ka rta kala ïoh ban phet katba u Koldingstar u dang thiah lyngngai ha katei ka khlaw bad kala poi suk sha la ïing bad mynta ka dang don ha Civil Hospital Nongstoiñ ban leh medical checkup.
U SP u la pynpaw ba ka jingtohkit kala lap ba u Koldingstar Thongni u dei u kurim bala ïashong khlad bad ka samla kaba dang 18 snem ka rta kaba dei ka khun khatduh jong ki shi kurim.
La iathuh ruh ba ka daw jong katei ka jingthombor kadei namar ba u Koldingstar Thongni u dom ïa la ki kiaw ki kthaw ba kim shym la shah ïa u ba un ïashong ïa sah ryngkat lang bad ka khun khatduh jong ki.
U SP u la ong ba ki pulit ki la ioh kurup ia ka tiar ba la suba pyndonkam ha katei ka kam thombor, ryngkat bad kiwei kiwei ki sakhi sabut kiba kdew ba u Koldingstar Thongni u dei u bala suba don kti ha katei ka kam runar.
Na ka liang jong ki pulit kila register case pyrshah ïa u Koldingstar hapoh ki kyndon 103, 109, 118 bad 140 jong ka Bharatiya Nyaya Sanhita (BNS), bad ka jingtohkit kaba bniah ka dang ïaid shakhmat.
