Shillong, Naitung 39: U Symbud Myntri Rangbah ba khmih iaka tnat PWD (Roads) Bah Prestone Tynsong u la pyntip baka Sorkar kala bthah ia ka NHIDCL ban pyndep noh iaka Sub-Way hapoh ka por ba la buh khnang ban shah noh iaki kali ban iaid lyngba ka surok Shillong-Dawki.
Hadien ka jingïalang bishar kam jong ki projek surok bapher bapher u Bah Prestone u la ong ba ka jingïakren ka kynthup ïa ki Project ha kylleng ka Jylla Meghalaya, kynthup ïa kiba don ha Garo Hills bad ïa ka High-Speed Corridor.
“Ngi la don ka jingiakren kaba bniah halor ka jingiaid jong ki kam, ym tang ia ka Shillong-Dawki hynrei wat ia ki projek bapher bapher ha ka Jylla Meghalaya, kynthup ha Garo Hills, bad ia ka High-Speed Corridor ruh” u la ong.
U Symbud Myntri Rangbah u la ban jur ba ka jinglah ban pynïasoh biang iaka bynta jong ka surok Shillong-Dawki ka long kaba kongsan namar ka jingdonkam na ka bynta ka khaii pateng bad ka leit ka wan man kaba man sngi.
“Haba iadei bad ka surok Shillong-Dawki, ngi la shim ia ka rai ban bthah ba ka NHIDCL ka hap ban pyndep ia ka jingshna ia ka Sub-Way hapoh ka 10 tarik Nailar. Ha ka 10 tarik Nailar ngi hap da kano kano ka lad ruh ban plie biang ia ka jingleit jingwan jong ki kali na katei ka bynta ba shah rong ka surok” ka ong u Bah Prestone.
U la bynrap ba haka jingialang la iakren sani bha halor kiwei ki jingeh jong ki projek jong ka NHIDCL.
“Shaphang kiwei pat ki mat ruh, ngi la iakren bad pynbeit ia ki, kynthup ia ki projek ha Garo Hills kiba dang don hapdeng ka jingpyntrei daka NHIDCL,” u la ong.
 Bah Prestone Tynsong u la pyntip baka Sorkar kala bthah ia ka NHIDCL ban pyndep noh iaka Sub-Way hapoh ka por ba la buh khnang ban shah noh iaki kali ban iaid lyngba ka surok Shillong-Dawki.){kind=link}