Nagaland | Kwah ka ENPO ban mynjur ia ka ain FNTA hashuwa ka Independence Day

Tuensang, Naitung 29: Ka Eastern Nagaland People’s Organisation (ENPO) ka la kyntu ia ka sorkar Nagaland ba ka dei ban khot noh mardor ia ka dorbar kyrpang jong ka iingdorbar thawain ka jylla ban thaw ia ki ain na ka bynta ka riti synshar jong ka Frontier Nagaland Territorial Authority (FNTA).

Ha ka kyrwoh ba la pynmih ha ka sngi Ba-ar, ka ENPO ka la pdiang sngewbha ïa ka rai jong ka kynhun myntri ka Jylla ha ka 6 tarik Naitung ban ai ïa ka bor thaw aiñ sha ka FNTA katkum ka Memorandum of Agreement (MoA) ba la ïasoi hapdeng ka Centre, ka sorkar Nagaland bad ka ENPO ha New Delhi ha ka 5 tarik u Rymphang 2026.

Ka seng ka la ong ba ka jingiasyllok hapdeng ka sorkar jylla bad ka the Union Ministry of Home Affairs (MHA) katkum ka kyndon 3.3 jong ka MoA ka la iaid shaphrang bad mynta ka la don ha ka kyrdan kaba khatduh.

Ka la kdew ba ka sorkar jylla ka la pynbna hi ha ka 6 tarik u Naitung ba yn khot ia ka dorbar kyrpang jong ka iing dorbar ban thaw ain kaba ai bor ia ka FNTA da ka bor thaw ain halor ki sobjek ban pynkylla sha ka.

“Kumta, da kaba bud ryntih ïa ka rai bad rai jong ka kynhun myntri ka Jylla ha ka 6 tarik u Naitung, 2026, la khmih lynti ba ka Sorkar Jylla kan khot ïa ka dorbar kyrpang jong ka Legislative Assembly khlem da pynslem shuh,” la ong ka ENPO.

Ka seng ka la pynpaw ka jingkyrmen ba ka sngi laitluid jong ka ri mynta u snem kan long ka jingpyndep ia ki jingkular ba la ai hapoh ka MoA bad kan pynpaw ia ka jingshaniah bad ka jingshimkhia jong baroh ki nongdon bynta kiba don bynta ha ka jingpyntreikam.

Ka ENPO ka la pynkynmaw ruh ba ka la pynsangeh noh ïa ka jingthmu jong ka ban pynlong ïa ka jingïalang paidbah ha ka 10 tarik u Naitung hadien ka jingkyrpad na ka sorkar Nagaland, u convenor ka ENLU bad u MP jong ka Rajya Sabha ka jylla ban ailad ïa ka jingïakren ban ïaid shakhmat.

Haba kyrpad ia baroh ar tylli ki sorkar jylla bad ka sorkar kmie ban pynsted ia ka jingthaw ia ka FNTA, ka ENPO ka la ong ba kane ka sienjam kan long katkum ka jingthmu jong ka “Viksit Bharat 2047” bad ka nongrim jong ka Sorkar India kaba long “Sabka Saath, Sabka Vikas, Sabka Prayas, Sabka Vishwas.”