Guwahati, Naitung 28: Da ka jingkiew jong kiba ïap na ka jingshlei um mynta u snem ha Assam sha ka 75 ngut, u Myntri Rangbah ka Jylla u Himanta Biswa Sarma ha ka sngi Ba-ar u la pynbna ïa ka jingïarap ïa ki longïing kiba shah ktah, kynthup ïa ka jingïarap pisa, ka jingkyrshan ha ka pule puthi bad ka jingsiew bai lutksan na ka bynta ki jingdon jingem kiba la shah pynjulor.
Da kaba pynpaw ba ka sorkar kan “kan ialeh katba lah ban iarap ia ki briew ” ban tei pat ia ka jingim jong ki, u Sarma u la pynpaw ia ki lad ki lynti kiba thmu ban ai jingiarap mardor bad kumjuh ruh ban pynbha pat ia kito kiba la shah ktah ha ka jingshlei um kaba shyrkhei.
Hapoh kane ka song jingiarap, ki longïing jong kito kiba ïap ha ki jingjia ba ïadei bad ka jingshlei um kin ïoh ïa ka jingai jingiarap kaba la buh ka long ₹4 lak khlem da donkam ban leh ïa ka post-mortem.Ki longïing jong ki briew kiba jah rngai palat 30 sngi kin ïoh ruh ïa ka jingiarap kaba ₹4 lak, katkum ki kyndon aiñ ba la buh.
Nalor kata, ka sorkar jylla kan ai pisa shuh shuh sa ₹5 lak na ka pisa jong ka Chief Minister’s Relief Fund sha ki bahaïing hasem jong kiba la khlad noh, nalor ka jingsiew bai lutksan kaba 4 lak.
Palat shi lak tylli ki longïing kiba la shah ktah jur ha ka jingshlei um kin ïoh ₹15,000 hajar kawei kum ka jingïarap pisa kaba kyrkieh ban pyndap ïa ki jingdonkam ba kongsan.
U Myntri Rangbah ka Jylla ula pynbna ruh ba ka jingïarap ïa ka Orunodoi kan sdang biang naduh ka 1tarik Nailur, ha kaba ki nongïoh jingmyntoi ha Charaideo, Jorhat, Golaghat bad Sivasagar kin ïoh ₹2,500 na ka bynta u bnai.
Ban pynduna ia ka jingpynthut ia ka pule puthi, ka sorkar kan ai ia ka jingiarap kot kaba ₹1,000 na ka bynta ki samla pule Higher Secondary, ₹3,000 na ka bynta ki samla pule undergraduate bad ₹5,000 na ka bynta ki samla pule postgraduate ha ki distrik kiba la shah ktah jur ha ka jingshlei um.Yn ai kot pule khlem jingsiew sha baroh ki khynnah skul, katba yn ai ka jingiarap pisa na ka bynta ban thied ia ki jain skul.
Ki khynnah skul kiba la duh ïa ki Class X bad XII certificate bad ki mark sheet ha ka jingshlei um kin ïoh duplicate ïa ki kot ki sla khlem jingsiew ei ei.
U Sarma u la ong ba ka jingkheiñ ïa ki jingshah pynjulor ha ki ïing ki sem, ki jingri jingdup, ki jingri dohkha bad ki jingthung jingtep kan sdang ha ka 3 tarik u Nailur, hadien kata yn sa pyllait ïa ka bai lutksan sha ki nongïoh jingmyntoi kiba dei hok.
Kine ki jingpynbna ki wan ha ka por ba ka Assam ka pynkylla ïa ka jingpynleit jingmut na ka jingpyllait im sha ka jingpynbha pat hadien kawei na ki jingshlei um kaba la pynjulor bha ïa ka jylla ha kine ki snem ba la dep, kaba la wanrah ïa ka jingjulor kaba jur ïa ki ïing ki sem, ka rep ka riang, ki jingtei bad ki lad kamai ha kylleng ki distrik.
