Shillong, Naitung 29 : Ka National People’s Party (NPP) ha ka sngi Balang kala kynnoh ia ki seng sain pyrthei ba ialeh pyrshah ba pynsaphriang ia ki khubor lamler halor ki nongrim ka party haba iadei bad ka Foreign Contribution (Regulation) Amendment Bill, 2026 bad ong ba ka NPP kala dep leit iakren ia kane ka kam bad ka Sorkar Pdeng ha ka kyrdan kaba halor eh.
Ha ka kyrwoh, u National Working President ka NPP bad MP ka Rajya Sabha James K Sangma ula ong ba ki jingkam ba ka NPP kala sngap jar halor kane ka amendment bill ka dei ka bym don nongrim satia.
Ula kynnoh ba ki khubor kila mih na ki party shimkabu kiba ialeh pyrshah, kiba tip tang ban hylla bad pynkulmar jingmut khnang ban ioh jingmyntoi ha ka sain hima sima.
Ka NPP ka ong ba dei tang ma ka na ki seng sain pyrthei napoh ka thain kaba la leit ban pynpaw ia ka jingpyrshah hakhmat ka Sorkar Pdeng ban iada ia ki Balang bad ki seng niam kiba rit paid.
Haba kdew ia ki jingiakren ba dang shen, ka NPP ka ong ba u Myntri Rangbah bad National President Conrad K Sangma ula ialam ia ka kynhun ki nongiala niam ban iakynduh ia u Myntri kam Pohiing ka Ri Amit Shah ha New Delhi ha u bnai Naitung 2026.
Ka kynhun ka kynthup ia ki nongmihkhmat na ka Presbyterian Church of India, North East India Christian Council, Catholic Archdiocese ka Shillong bad Garo Baptist Convention.
Ha ka jingialang, ka kynhun kala pynsngew bad aiti da ka dorkhas ia ka jingsngewkhia haba iadei bad ka kyndon 16A(5) bad kiwei pat ki kyndon pyrrkhing jong ka Draft FCRA Bill hakhmat u Myntri kam Pohiing ka Ri
Ka kynhun kala kyntu ia ki seng niam kiba pyniaid ia ki kam pule puthi, ka koit ka khiah bad ka jingshakri ia ka imlang sahlang ba kim deiban shah pynthut.
Ka NPP ka pyntip ba u Amit Shah ula kular ba un sa khot ia ka jingialang ia ki kynhun bapher bapher ban iasyllok ia kane ka kam.
Ka NPP kala kdew ruh ia ka jingialang ba long ha u bnai Iaiong 2026 hapdeng u Myntri Rangbah, u Symbud Myntri Rangbah Bah Prestone Tynsong bad ki nongmihkhmat na ka Catholic Bishops’ Conference of India lem bad u Myntri ka Sorkar Pdeng Kiren Rijiju.
Ka jingphaikhmat ha katei ka jingialang ka long ban iada ia ki seng niam kiba trei ha ki jaka kyndong bad ki jaka ki riewlum haba kyntu ruh ban ai jingiada na ki kyndon kiba buh jingma ia ka jingtreikam bad ka jingdon jingem.
 ha ka sngi Balang kala kynnoh ia ki seng sain pyrthei ba ialeh pyrshah ba pynsaphriang ia ki khubor lamler halor ki nongrim ka party haba iadei bad ka Foreign Contribution (Regulation) Amendment Bill, 2026 bad ong ba ka NPP kala dep leit iakren ia kane ka kam bad ka Sorkar Pdeng ha ka kyrdan kaba halor eh.){kind=link}