Shillong, Naitung 28 : Ka jingiakhun hapdeng ka Meghalaya Police FT bad ka Rangdajied United FC ha ka lympung Shillong Premier League 2026 ha ka janmiet sngi Ba-ar, ka la kut ha ka jingiakhaid da mar shi kol.
Haba phai sha ka jingiathep kol, dei ka Rangdajied United FC kaba la ioh ban pynkhih nyngkong ia ka jar kaba la thep lyngba u Dameki Khongstia (20’) ia kaba na ka liang ka MLP kala ioh ban pynphai kylla lyngba u Pynshailang L Lyngkhoi (53’).
Ha kane ka kynti iakhun kaba mynta, ka MLPFT ka la lah ba kan sei madan kham bun da ki juh ki rang ialehkai, ha kaba ki kato katne ki rang ialehkai kiba ka la pynrung sha la ka jong ka kynhun ki dang don hapdeng ki kam ia kilan jong ka kam (training), kaba shiban ka donkam bha ia kine ki rang ialehkai ba kin wanphai sha ka kynhun ialehkai, kum shi bynta ban nang pynkhlain bad kiban lah ruh ban lah wat tang ha kaban iai neh shwa ialade ha kane ka lympung mynta ka samoi.
Haba phai sha ka jingiakhun, ha ka kylla step, ka rukom ialehkai kaba tbit bha ka la mih na ki khynnah ka Rangdajied United FC, kiba la sei madan ia ka sap ialehkai kaba itynnad, kaba la pynklumar hi thlim ia ki rang ialehkai ka MLP FT.
Ka jingioh ka Rangdajied ban thep ia kane ka shi kol ka jia long hadien ba u rang ap kol ka MLP FT u Eveningstar Bareh um shim la don ha ka jaka kaba u dei ba un don, ha kaba um shim la lah shuh ban ioh ban iada ia ka bol ka bala shut da u Dameki.
Hynrei ha kaba kut, ki ar kynhun kila hun da ka jingioh ban iakhur mar shi point bad ba kin phai khmat pat ialade naka bynta ki jingiakhun kiban sa wan.
Lashai ka sngi, ka jingiakhun kan long hapdeng ka klob ba la rah la san sien ia ka nam lahduh kane ka lympung ka Shillong Lajong FC kaban iakhun pyrshah ia ka Nangkiew Irat FC, kaban long ha ka por 4:00 baje nohphai sngi.
