Kynmaw burom ka IIM ia u Dr APJ Abdul Kalam | Pynieng ia u motdur rnong ba phra phut

Shillong, Naitung 27: Ka Indian Institute of Management (IIM) ha ka sngi Nyngkong, kala kynmaw burom iaka lyngkhuh sngi iap kaba 11 jong u President barim ka Ri India Dr. A.P.J. U Abdul Kalam da ka jingplie paidbah ia u mot dur ba shi rynieng ba la shna da ka rnong.

Ïa une u motdur ba jrong 8 phut la plie paidbah da u Shishir Kumar Bajoria uba dei u Chairman jong ka Board of Governors ka IIM Shillong ha ka jingïadonlang ki dkhot ka Board kynthup u Atul Kulkarni bad u Nitin Sharma, Director Prof. (Dr.) Arun Mohan Sherry, CAO Col. Dinesh Adhikari (Retd), ki nonghikai bad ki samla pule.

Ia une u mot dur (la pynieng kum ka jingpynkynmaw ia ka jingiadei kaba jylliew hapdeng u Dr. Kalam bad ka IIM Shillong bad ki jingnoh synniang jong u ha ka pule puthi bad ka jingtei ia ka jaitbynriew.

Kane ka jingïalang ka la long ruh ka jingdap snem jong ka jingïakynduh paidbah kaba khatduh jong u Dr. Kalam.

Ha ka 27 tarik u Naitung 2015, u la ai ïa ka jingkren kaba khatduh ha IIM Shillong halor ka phangpdeng “How to Make Our Planet More Liveable”.

Ha kata ka jingkren, u la pynpaw ia ka bynta jong ki Sorkar, ki jaka treikam, ki stad saian, ki karkhana bad ki nongshong shnong khamtam eh ki samla ha kaba tei ia ka lawei kaba neh lyngba ka jingpynwandur thymmai, ka jingkitkhlieh ia ka mariang bad ka jinglong nongialam kaba don akor.

Ki samla pule ki kynmaw ieit ia u kum u “Kalam Sir.”

Ka jingïadei jong u bad ki paidbah jong ka IIM Shillong ka dang sah jingkynmaw kum kawei na ki por ba kongsan ha ka histori jong kane ka jaka pule, kaba pynpaw ïa ka jingngeit jong u ha ka bor bad ki jingmut jingpyrkhat jong ki samla ban wanrah ïa ka jingkylla.
La pynkut ia kane ka jingialang da ka jingbuh syntiew ha u motdur.

Ka IIM Shillong ka pynpaw ba ka dang ïai bteng ban pynïaid shakhmat ïa ka jingthmu jong u Dr. Kalam ban pynroi ïa ka jinglong nongïalam ba shai bad ba kit jingmut.

Ka khubor jong u na kata ka jingkren kaba khatduh ka dang ïai bteng ban ïalam ïa ka jingpyrkhat jong ka IIM Shillong halor ka jinghikai, ka jingwad bniah, ka jingpynwandur bad ka jingïalam kaba pynshong nongrim ha ki jinglong na ka bynta ki pateng ban wan.