Shillong, Naitung 27 : Ka Sorkar Jylla ha ka sngi Nyngkong, kala ai jingmynjur ia ka song T.22.7 klur kum ka bai jaka kaba donkam na ka bynta ban pyniaid ia u sainar boring ba 132KV ba jrong 6.5km ha Mawkhanu, New Shillong Township.
Ia kane ka rai la shim ha ka jingialang jong ka Kynhun Myntri kaba la pyniaid da u Myntri Rangbah Conrad K Sangma.
Haba kren sha ki lad pathai khubor hadien ka jingialang, u Myntri Sorkar Marcuise N Marak ula ong ba une u sainar boring un pyniasoh ia ka substation ba 220/132 KV bala don kypa sha ka Mawkhanu Sub Station ba 132/33KV, 2×50 MVA ba la tyrwa.
“Ka lain ka jrong kumba 6.5 Km ban pynpoi ia u sainar bording sha ka Mawkhanu Substation. Na ka bynta kane, ka Sorkar kan hap thied ia katto katne ki jaka, bad ka kynhun Myntri kala dep ban mynjur ia ka jingsiew bai lutksan” ong u Marak.
Ula ong ba ka pisa bala mynjur ka long T.22.7 klur ban pyndonkam ha ka ban siew sha ki trai jaka.
U Myntri ula pynshai ruh ba na ka bynta ka project pyniaid sainar bording, ka jaka bala pyndonkam da ka tnad la khot kum ka “Right of Way”.
