Shillong, Naitung 27: Ka North Eastern Hill University Students’ Union bad ka KSU NEHU Unit ha ka sngi Nyngkong kala pynapw ia ka jingsngew laitluid halor ka jingmih noh u Vice Chancellor Prof PS Shukla bad kila kyntu ia ki bor pyniaid kaban shimkhia ia ki mat ba sahteng na ka jingpyniaid ia ka skulbah bad ki mat ba iadei bad ka pule puthi.
U General Secretary ka NEHUSU u Martin Warjri, haba iakren bad ki nongthoh khubor ula ai khublei ia ki kynhun baroh, Dorbar Shnong, ki kynhun jong ki samla pule bad ki kynhun jong ka imlang sahlang kiba la kyrshan ia ki jingiakhih kaba kila pynlong naduh kaba sdang.
“Ngi ai khublei ia baroh kiba la ieng ryngkat lang bad ngi. Mynta ka sngi, ngi dap da ka jingsngewtynnad ban pynbna ba u Prof. Shukla ym don shuh ha ka NEHU campus. Ka skulbah mynta kala long kaba laitluid na kito kiba la kiar ban shim ia ka jingkitkhlieh ia ki jingeh kiba la mad da kane ka skulbah” ula ong.
Une u nongialam ki samla pule ula leit ban ia kynduh ia u Acting Vice Chancellor Prof SK Barik bad aiti ia ka dorkhas ban pynpaw ia ki jingsngewkhia kiba la shu ieh kumto ha kine ki snem kiba la dep.
Ha ka jingiakren, u Warjri ula ong, ba kila ia pynleit jingmut ha kaba iadei bad ka jinglong jingman bad ia ka jingkitkhlieh jong ka skulbah. Kawei na ki mat kaba kongsan kaba la pynpaw kadei halor ka jingthungkam ha ka kyrdan Registrar In-charge bad Finance Officer In-charge kaba la leh ha ka por jong u Prof Shukla.
Ka NEHUSU kala kynnoh ba ka rukom treikam kam shim la iaid satia katkum ki kyndon jong ka NEHU Act bad Statutes bad kala kyntu ia u Acting VC ban khmih bniah ia kane ka mat bad ban shim ia ki sienjam kiba dei.
U Prof Barik ula pynthikna ia kane ka kynhun ba yn sa rah ia katei ka mat ha ka jingialang jong ka Executive Council ba kan ioh bishar bniah.
Ka union kala banjur ruh ia ka jingdonkam ban pynkhie im ia ka Convocation jong ka skulbah ia kaba ym shim la pynlong shuh mynta la 3 snem.
U Martin Warjri ula ong, ba ka long kaba kongsan ban pynthikna ba ki samla kin ioh pdiang ia ka Degree ha ka jingialang bad ba ia katei ka rukom leh dei ban bteng biang ha kine ki snem ban wan.
U Prof Barik ula pynpaw, ba yn sa shimkhia ban pynlong ia ka Convocation hapoh jong u bnai Nohprah 2026.
Ka jingduna ki nonghikai bad ki nongtrei kadei ruh ka mat kaba la pynpaw ha katei ka jingiakren.
Ka NEHUSU kala kdew ba katei ka jingduna kala pynmih ia ka jingeh kaba khraw ia ki nonghikai ha kaba uwei u nonghikai un hap ban peit ia ki spah ngut ki samla pule bad wat ka rukom treikam treijam ruh kala shah ktah lut.
U Acting VC ula pynthikna ba ki bor pyniaid kin sa khmih bniah ia ka jingdonkam ia ki nonghikai bad ki nongtrei.
Ki samla pule kila kyntu shuh shuh ia ki bor kiba dei khmih ban pynthikna ba dei ban pynlong ha ka por kaba la buh ia ka jingpdiang ia ka admission ha une u snem uba mynta, namar ha ki snem kiba la dep kala don ka jingslem ha kaba iadei bad kane ka bynta. Kila pynpaw ruh ia ka jingthylli ki kam ha ki kyrdan kiba heh jong ka skulbah ha kine ki ar snem kiba la dep bad kila dawa ba dei ban shim mardor ia ki sienjam ban pyndap ia kitei ki kyrdan ban pynthikna ba ka rukom treikam kan long kaba iaid beit iaid ryntih.
U Martin Warjri ula ong, ba u Acting VC u long uba kloi ban iakren na ka bynta ka bha ka miat jong ka skulbah bad ula ai ka jingkular ban shimkhia ia ki jingeh kiba la pynsngew.
