Shillong, Naitung 22 : U Myntri Sorkar bad MLA ka Jowai Bah Wailadmiki Shylla ula ther ia ka Liang Pyrshah Voice of the People Party (VPP), haba buh jingkylli ia ka jinglah jong ka ban pyniaid ia ka synshar khadar haba ai nuksa ia kaei kaba jia ha KHADC.
Une u Myntri Sorkar ula kyntu ia ki paidbah ba kim dei ban ngeit ha ki jingkynnoh ba laiphew jait laiphew rukom jong kane ka Seng kiba long pyrshah ia ka Sorkar MDA ba ialam da ka NPP.
Haba kren ha ka rynsan ialap elekshon shiteng samoi ka Shillong Lok Sabha na ka bynta u kyrtong ka NPP Dr DRL Nonglait ba long ha Ummulong Madan Khawang ha ka miet sngi Ba-ar, u Bah Wailad ula ong ba ka VPP kala khein poh ia ki bor synshar nala tynrai hadien ba wanrah ia ka Act hapoh KHADC bad hadien kala pyndam ia ki kyndon kiba buh ia ki Rangbah Shnong ban ai syrnot ia ki jaka ha ki shnong ki thaw.
“Hato kane kam dei ka jingknieh noh ia ka bor jong ki Rangbah Shnong jong ngi” ula buh jingkylli.
Ula kynnoh ba ki nongialam ka VPP kila wan sha Jowai ban pynpaw ia ka jingpyrshah ia ki kam pynroi kiba la pyntrei hapoh ka constituency, watla ma ki dalade kila pyni ba kim don satia ia ka jingiatylli.
Haba kynthoh ia ki 4 ngut ki MLA ka VPP, u Bah Wailad ula ong ba kane ka party kam shym la lah ban wanrah ia ka jingiatylli wat hapoh ka District Council.
“Kala don ha ka bor ha KHADC tang shisnem tam. U CEM ula iehnoh kam, u EM ula iehnoh kam. Hato kane ka dei ka iing kaba im ha ka jingsuk bad jingiatylli?. Ki dang shu sdang ban synshar ha KHADC hynrei phi la iohi hi dalade ia ki kam bakim shym la iaid beit iaid ryntih” ula ong.
Ula kdew ia ka jingiakhih ba dang shen jong ka Hima Sohra bad ka jingkynnoh ba ki samla kiba kyrmen ban ioh kam, kila shah beh kam pynban ha KHADC tang mar syn shimti ka VPP ia ka bor ha kane ka Council.
“Ka dang shu sdang ban shimti ia ka jingsynshar ha KHADC hynrei kila mih pynban shibun ki kynrum kynram. Pyrkhat phi ia kaei ka ban jia lada shisien ka por phi ai ka kabu ia ki ba kin pyniaid ia ka Jylla baroh kawei” ula bynrap.
Hynrei ula ong ba peit sha ka NPP kaba don 32 ngut ki MLA, kala pyni ia ka jingtylli bad kala kren tang da kawei ka sur.
“Phin nym iohsngew ia u Symbud Myntri Rangbah Bah Sniawbhalang Dhar ban kren pher na kaei kaba kren u Bah Prestone Tynsong lane u Myntri Rangbah. Wat haduh mynta ngi dang dei ka iing kaba im ha ka jingsuk bad ka jingiatylli” ula pynpaw.
U Bah Wailad ula jubab ruh ia ki jingkynnoh jong u President ka VPP halor ki kali jong ki MLA.
U iathuh ba ma u, ula leit la wan da ka kali Sorkar ka Fortuner kaba don u nombor ML01, katba u President ka VPP watla um don satia ha ka Sorkar, ula pyndonkam da ka kali Fortuner shimet.
“Naba ia nga, kum u Myntri Sorkar nga la ioh ia ka Fortuner ka Sorkar, hynrei ngi hap kylli nano u President ka VPP u ioh ia ka Fortuner” ula buh jingkylli.
, haba buh jingkylli ia ka jinglah jong ka ban pyniaid ia ka synshar khadar haba ai nuksa ia kaei kaba jia ha KHADC.){kind=link}