Shillong, Naitung 22 : Ki Pulit ka East Khasi Hills kila pyntip ba ia ki arngut ki khynnah ba jah na Trongpleng ha ka step sngi Balang, la lap ia ki ha ka Iingsah jong ki bahaiing kaba don ha Nongrah.
Haba kren sha ki nongthoh khubor, u SP (City) Bah Dangaan Khyriem u pyntip ba u Superintendent of Police ka South West Khasi Hills ula pyntip ia ka jingjah jong kine ki khynnah ba dang 11 bad 13 snem.
Ha ka jingtohkit la lap ba kine ki khynnah kila kiew ha ka bos da ka jingthmu ban leit sha Mawsynram hynrei, kila wan poi pynban sha Shillong bad kila hiar na kali ha Anjali Point hashuwa ban kiew ia kawei pat ka bos ban leit sha Nongrah.
Kine ki Khynnah kila leit poi sha ka iingsah jong ki bahaiing kaba don ha Nongrah, bynrap u SP.
Ki bahaiing mar mar hi kila wan ialam ia ki sha Rynjah Police Station, ha kaba ki Pulit kila pyndep ia ki jingdonkam baroh bad shim jingthoh ia ki jingbatai jong ki ban pynthikna ba kumno ki wan poi sha Shillong.
Une u SP u pyntip ba kine ki khynnah kila don mynta bad la ki jong ki bahaiing bad ki dang don ha Rynjah Police Station ban pyndep ia ki kam ba hap ban leh.
