Kyntu ia baroh ar tylli ki Jylla ban bat ia ka status quo
Shillong, Naitung 22 : Ka jingsngew syier bad sheptieng kala rung ha ka jingmut jingpyrkhat jong ki nongshongshnong ka Langpih bad ki shnong ba marjan hadien ba ki trai shnong la kynnoh ba kila iohi ia ka jingwan rung ki Pulit Assam sha kane ka jaka iakajia kaba long haduh arsien ha ka shibnai khlem da pyntip ia ki bor Sorkar ka Meghalaya.
Ha ka shithi kaba la aiti sha u Deputy Commissioner, West Khasi Hills ha ka sngi Balang, u nongshong shnong ka Mawskikar u Bah Jylliew Singh Marwein ula ong ba lah iohi ia ki pulit ha ka 15 bad 20 tarik u Naitung.
Ula ong ba katei ka jingwan ka jongki, kadei kaba khlem da pyntip ia ki bor pyniaid district ne ia ki nongialam shnong bad kane kala pynlong ia ki nongshong shnong ban buh ia ka jingkylli bad ban sheptieng.
Ula pynpaw ba kala don ka jingrai ban pynneh pynsah kumba ka long hapdeng ka Assam bad Meghalaya, u Bah Marwein ula ong ba kano kano ka liang kaba ialeh ban iaid hi marwei kan pynthud ia ka shongsuk shongsain ha katei ka thain kaba don ka jingsngewkhia.
Ula pynpaw ruh ba ha ka jingjia iasiat ha u snem 2010, kila don 4 ngut ki briew kiba la duh ia la ka jingim na ka jingshah siat ha ki pulit Assam bad ong ba katei ka jingjia ka dang iai long kaba sah jingkynmaw ha ki nongshong shnong kiba iai bteng ban im da ka jingsheptieng.
Katkum katei ka dorkhas, la pynpaw ba kum katei ka rukom leh kadei ka jingthmu ban pynthud bad ban pyndik ia ki nongshong shnong.
Kila maham ba kane ka jingwan jubor ka lah ban pynduh noh ia ka jingshaniah bad pynmih pat ia ka jingiakynad ha shi lynter ka thain khappud, lada ym shimkhia noh mardor ia kane ka kam.
Ha ka shithi la kdew ruh ba ka jingleh bym patiaw ia ki riti synshar tynrai kum ia ki nongialam shnong ka long kaba iaid pyrshah ban pynlong ia katei ka thain kaba jai-jai.
Ki nongshong shnong kila kyrpad ia ka Sorkar Meghalaya ba kan rah ia kane ka mat bad ka Sorkar Assam ban pynthikna ba kano kano ka jingiaid kaba nangne shakhmat jong ki pulit ha Langpih dei ban leh tang ynda la ai lypa ia ki jingtip bad don ia ka jingiatreilang bad ki ophisar ka thain bad ki nongialam shnong. Kila dawa ruh ba dei ban pynlong ia ka jingtohkit halor ki artylli ki jingjia kiba dang shen bad ban pynthymmai ia ka jingiakular na baroh artylli ki Jylla ban bud ryntih ia ka jingiatehkular ban pynneh pynsah kumba ju long.
“Ka thain khappud ka donkam ia ka jingsuk bad jingshngain bad ki briew kiba im hangne ki dei hok ban ioh ia ka jingiada bad ia ka burom” la pynpaw ha ka jingthoh.
