Shillong, Risaw 07: Ka kynhun niah thuk thuk ki shipai bala tip kum ki “Tornadoes” kala wan poi hynne ka sngi thohdieng ha Nongbah Shillong ban pyndon burom ia ki shipai ba shlur ka Ri bad kiba la khlad ha ka jingialeh ban iada ia ka Ri.
Kane ka dei shibynta na ka 2600km Motorcycle Expedition ba 17 sngi jong kane ka kynhun niah thuk thuk kaba long ruh kum ka jingpynkhreh ia ka jingrakhe ia ka 11th Reunion bad ka 262nd Corps Day ka Army Service Coprs ka ban long ha ka 8 tarik Nohprah, 2022.
Kane ka kynhun ba 15 ngut ki Nongniah thuk thuk kiba shang kylleng ki jaka da ki Royal Enfield, kin leit rung ha baroh ki Jylla ka Thain Shatei Lam Mihngi bad kin leit buh syntiew ruh ha ki motsahnam jong ki shipai ba khlad ha ka thma (War Memorial) ba don ha Assam, Arunachal Pradesh, Manipur, Meghalaya bad Nagaland.
Kane ka Expedition ka la sdang naduh ka 1 tarik Risaw na Tezpur, Assam bad la kaweh lama ia ka da u Lt Gen DS Rana AVSM, YSM, SM, GOC 4 Corps. Kane ka kynhun kala dep iaid lyngba ka Tenga Valley, Bomdila-Sela Pass-Tawang- Fwd Post ka Tawang- Kalaktang – Guwahati bad hynne ka la wan poi ha Shillong
Hangne ha Nongbah Shillong, kane ka kynhun kan leit buh syntiew ha ka War Memorial ha Nongbah hashuwa ban kaweh lama biang ia ka da u Lt Gen KC Panchanathan ,GOC ,101 Area ha ka 9 traik Risaw ba kan leit sha Kombrian – Imphal – Dinjan bad ban pynkut biang ha Gajraj War Memorial kaba don ha Tezpur ha ka 17 tarik Risaw.
Kum ban shu kdew, kane ka kynhun niah thuk thuk Tornadoes ka dei kaba la pynkha naduh u snem 1967 bad kala bat haduh 32 tylli ki World Record. Kane ka kynhun ka dei kaba don ha ASC Centre (South) Bangalore bad ka kynthup haduh 39 ngut ki nongniah thuk thuk ba kynthup ia 2 ngut ki Ophisar, 2 ngut ki Junior Commissioned Officer bad 35 ngut kiba dei jong ki kyrdan bapher bapher.
Kane ka kynhun kala mihkhmat ia ka India haduh hynriew sien ha ki jingiakop niah thuk thuk ha Bhutan. Ka kynhun kala ioh haduh khyndai tylli ki World Record ha u Naiwieng 2020 ha ki jingiakop niah thuk thuk bapher bapher kynthup ia ka jingniah jngai tam lyngba ka tunnel ba tbeh ding bad ka kiew ia u lum Pyramid ba jrong bad ba sted tam.
