Shillong, Risaw 07 : Ka National People’s Party (NPP)-Amlarem Block hynne ka sngi thohdieng, kala pdiang burom ia ka jingwan pyniasoh u MLA barim ka UDP bad katto katne ki Nongbud ban kyrshan ia u MLA barim u ban iakhun noh na ka NPP ha ka elekshon MLA-2023 na Amlarem Constituency.
Une u MLA barim uba wan pyniasoh u dei u Bah R.L.Tariang bad u MLA barim ban iakhun na ka ticket jong ka NPP u dei u Bah Stephanson Mukhim.
Ka Amlarem Constituency ka dei kaba la mihkhmat mynta da u Myntri ka Tnad kam Pohiing bad ka Tnad Pule Puthi ka Jylla ma Lahkmen Rymbui jong ka United Democratic Party (UDP).
Ia kane ka jingialang la pynlong ha Hall ka Syiem Jingsuk High School, Amlarem ha ka jingiadon ryngkat u President ka NPP West Jaintia Hills bad arngut ki MLA ka party ba kynthup ia u Bah Wailadmiki Shylla, ki MDC ka JHADC bad kiwei kiwei.
Kane ka jingwan pyniasoh u MLA barim Bah RL Tariang sha ka NPP kan nang pynkhlain shuh shuh ia u Bah Stephanson Mukhim ha ka elekshon ban wan.
U Bah RL Tariang ula pyntip ba ka daw ba u pyniasoh sha ka NPP ka dei namar ba um shym la iohi satia ia kano kano ka kam pynroi bala wanrah da u MLA ba mynta (ma Lahkmen Rymbui) ha ka Constituency.
U Bah Tariang ula ong ruh ba kum u Myntri Sorkar, kila don ruh shibun ki jingkynnoh pyrshah ia une u MLA ka Constituency kaba long jan manla ka sngi.
U Bah Wailadmiki ula pyntip shaphang ka NPP bad kdew ba ka Sorkar MDA bala ialam da ka NPP kala trei khlem shongthait ban pyndep ia ki skhim kiba la ieh shiteng da ka sorkar bala leit noh la ka dei ka jingiakajia pud, ka jingshna ia ki ain na ka bynta ka bha ka miat ki paidbah ka Jylla bad kiwei kiwei.
U Bah Stephanson ula kyrpad ia ki paidbah ba kin kyrshan ia u kumba ki leh ha u snem 2013 ha ka por ba u dang dei u kyrtong shimet bad mynta ynda shah jied biang, un sa lah ban pyndep ia ki kam ba dang sah bad ruh ba un nang wanrah ia bun ki kam pynroi ha ka Constituency.
