Shillong, Risaw 17: Ka Sorkar Meghalaya kala tyrwa ban tei ia ka Biotechnology Park ba kyrpang na ka bynta ban buh ia 100 tylli ki Biofoundries bad ki Biomanufacturing Units, ryngkat bad ka jingai jingkyrshan pisa na ka bynta ka jingseng kam, ki jaka treikam ban pynlong ia ka jingwad bniah bad ki nongkynshew tyngka hapoh jongka Draft jong ka Meghalaya Biotechnology Policy.
Ka draft policy, kaba la pynkhreh da ka Bio-Resources Development Centre (BRDC) hapoh jongka tnad Planning, Investment Promotion and Sustainable Development Department, ka thmu ban pyndonkam ïa ki jingdon jingem kiba kyrhai ryngkat bad ia ka jingstad tynrai ban pynmih ia ki lad aikam, ban kyntiew ïa ka jingwad bniah bad ban khring ïa ki nongkynshew tyngka.
Ka Sorkar kala iawer ia ki paidbah bad kiba donbyntalang ban ai jingmut shwa ban pynlong ia katei ka polisi treikam kaba pura bad kala kyntu ia ki nongshong shnong, nongrep, nongseng kam, nongwad bniah, ki jaka pule, ki nongmihkhmat na ki karkhana bad ki kynhun ka imlang sahlang ban aiti ia ki jingai jingmut jong ki hapoh jongka 23 tarik u Risaw.
Ka jingtyrwa ban tei ia ka Biotechnology Park ka long ban shakri kum ka jaka pdeng ban leh ia ki kam wad bniah, ka jingleh ia kiei kiei kiba thymmai bad ka jingpynmih ia ki mar ban ioh khaii pateng, da ka jingthmu ban buh ia ka Biotechnology Cluster, Innovation Hub ne ki shlem ban leh ia kino kino kiba long thymmai bad ki jaka ban pynmih ia ki mar ha kylleng ki district.
Katkum kane ka draft policy, ka Jylla ka thmu ban pynkhlain ia ka jinglong jingman ia ka Biotechnology lyngba ki Laboratory, Incubation Centre, ka jingsdang ia ka jingpynmih ia ki mar ne ia ki tiar ki tar kum ka jingpyrshang bad ka jingdon ia ki jingtei ban leh ia ka jingwad bniah kaba kyrpang. Kala tyrwa ruh ban don ia ki jingtei kiba kyrpang ban pynmih ia ki dawai dashin, ka jingpyniaid shakhmat ia ka koit ka khiah katkum ka jingdon ka Meghalaya ia ki dawai tynrai.
: Ka jingpynleit jingmut ha ka rep ka riang, ka koit ka khiah bad ka jingstad tynrai
Ka polisi treikam kan ithuh ia ka rep ka riang, ka jingshngain jong ki marbam, ka koit ka khiah, ka Industrial Biotechnology bad ka jingpynneh pynsah ia ka mariang kum ki bynta kiba kongsan ban ialeh ban kyntiew shaphrang.
Ha ka rep ka riang, la tyrwa ban pyndonkam ia ka Biotechnology na ka bynta ki jingthung kum u Lakadong, sohtrun, sying, sohniamtra, sohmarit bad u tit. Kane ka Draft ka thmu ban kyrshan ia ka Tissue Culture Laboratories, Biofertiliser bad jingpynmih ia ki Biopesticide, ki jingthung kiba lah ban kyrda ia ka jinglong ka suiñbneng bad ki marbam kiba kongsan.
Nalor kane, ka tyrwa ruh ban pynshisha da ka jingstad saïan ia ki jingstad tynrai ha kaba iadei bad ki dawai kynbat bad kiwei kiwei ki dawai dashin, ka jingwad bniah ha kaba iadei bad ka Bioactive Compunds na ki kynbat dawai tynrai.
Ki jingpyndonkam ha ka mariang, kaba kynthup naduh ka jingpynkhuid ia ka um kaba jaboh, ka jinglum jinglang bad jingpynkhuid ia ki niut, jingpynmih ia ka Bioenergy, Biofuels bad ka jingpynneh pynsah ia ki jingim ne ki jingthaw ki bapher bapher, kadei ka mat kaba la buh hakhmat eh.
: Ka jingai jingkyrshan pisa ia ki nongseng kam bad ki nongkynshew tyngka
Kane ka Draft kan ai jingiarap da ka Subsidy, ka jingiarap ia ka sut, ka jingsiew biang ia ka GST jong ka Jylla, ka jingai Subsidy ia ka bording elektrik bad ka jingiarap na ka bynta ka kompani kaba la thep ia ka aplikeshon.
Ki nongsdang ia ka jingseng kam da kaba pyndonkam ia ka Biotechnology ha ki bynta kiba la buh kyrpang, ki lah ban ïoh ïa ka jingkyrshan pisa ia ka jingpynlut kaban kot haduh 75% haba ïashimbynta ha ki rynsan khaii pateng, ki jingpyninam bad ki jingïalang ban kyntiew ia ka kam khaii pateng, katkum ka jingbuh kyndon kaba long T.10 lak na ka bynta kawei ka jingsdang ia ka jingsengkam kaban man la ka snem.
Kane ka Policy ka tyrwa ban kyrshan ia ki nongwad bniah, ka jingpynroi ia ka sap ka phong ban kamai kajih, ka jingpynkynriah ia ki kor teknoloji bad ka kam khaii pateng, da kaba pynleit jingmut ha kaban thaw ia ki lad ban aikam aijam ia ki samla ka jylla.
Ka jingtyrwa ia ka Biotechnology Single Window Facilitation System kan pynbeit ryntih ia ki jingai jingmynjur bad ban pynbiang ia ka jingbud dien ia ki aplikeshon kiba la leh Online bad ka jingai jingiarap ia ki nongkynshew tyngka.
