Shillong, Naitung 16 : Ka Sorkar Jylla kala shong bishar ia bun ki sienjam bala shim ban pynkylla ia ka kam ri jingri ka Jylla kat kum ka juk mynta, kynthup ka jingshna ia ka College of Veterinary Science ha Kyrdemkular, ka jingpyniar ia ka jingtrei kam ka digital animal health service bad ka jingkyntiew kyrdan ia ki jingtei ban lah pynkhlain ia ka jingpynmih ia ki jingri nalor ban kyntiew ia ka kamai ki nongrep.
Haba pyniaid ia ka jingialang bishar kam bad ka Tnad Veterinary, u Myntri Rangbah Conrad K Sangma ula ong ba ka jing pynleit jingmut ka Sorkar ka long ban pynkhlain ia ki lad ai jingsumar ia ki jingri jingdup, pynkhlain ia ka jingpynmih bad ka lad kamai kajih na ka bynta ki nongrep.
Ha ka jingialang la pyntip ba ka Tnad kala ai ia ki Livestock Health Certificate ba shu leh online naduh u bnai Nailur 2025, haba pynbteng ia ki jingai injek ban iada ia ki jingpang bad ki prokram ai jingsumar ban pynthikna ia ka koit ka khiah ki jingri jingdup ha kylleng ka Jylla.
Ki heh Sorkar kila shim jingkhein ruh ia ka jingtreikam jong ki Livestock farm ka Sorkar bad ka Special Livestock Production Programme kaba yrshan ia ka kam ri sniang bad ri syiar-ki artylli ki kam ba kongsan na ka bynta ka lad kamai ha ki jaka nongkyndong ka Jylla.
Napdeng ki jingtyrwa kiba khraw bala iakren ha kane ka jingialang ka dei ka jingshna ia ka College of veterinary Science ha Kyrdemkulai, ka jingshna bha ia ki jingtei hapoh ki skhim bapher bapher ka Sorkar Pdeng bad ka jingpynieng ia ki Animal Check Post ha Ri-Bhoi bad West Garo Hills, ban pynkhlain ia ka jingtehlakam ia ki jingpang ki mrad bad teh kyndon ia ka jingwan pynpoi ia ki jingri jingdup nabar jylla.
Ka jingialang kala iakren ruh ia bun ki kam kiba la dep ban leh, kynthup ka jingpynthymmai ia ki farm ka Sorkar, ka jing buh ia ka Regional Semen Production laboratory bad Semen Bank na ka bynta ki blang bad ki langbrot ha Kyrdemkular hapoh ka Natonal Livestock Mission (NLM), bad ka jingshna ia ka Animal Shelter ha 22 Mer Narang, Ri-Bhoi hapoh ka Rashtriya Gokul Mission (RGM).
Kane ka jingialang bishar kam ka long shibynta jong ka jingpyrshang ka Sorkar ban pynkylla ia ka kam ri jingri kat kum ka juk ba mynta, pynbha ia ka jingai jingshakri ia ki jingri jingdup, pynthikna ia ka kamai kajih kaba neh na ka bynta ki nongrep lyngba ka jingpynkha symbai da ka jingstad saian, ka jingtehlakam ia ki jingpang bad ki jingtei kiba kham bha.
