Imphal, Naitung 15: Ka jingkulmar kala jia ha ka miet sngi ba-ar ha Senapati district jong ka jylla Manipur hadien ba ka kynhun ki riew paidbah ki la kawang maw ïa ka ktem jong ki shipai Assam Rifles, bad pynjulor ïa ki kali shipai bad thang ïa kawei ka kali hadien ka jingkhynra pyrshah ïa ki kaikhlaw hajan ka ktem jong ka NSCN (IM).
Katkum ka jingong ki heh ophisar ka tnad pahara, ka jingkulmar ka la mih hadien ba ki shipai Assam Rifles ki la pynlong ia ka jingpahara bad talasi ia ki jaka hadien ba ioh jingtip na ki tnad syntiat shaphang ka jingleit jingwan jong ki riew kieng atiar hajan Makuilongdi, kaba jngai kumba ar kilomitar eiei na ka ktem jong ki dkhot ka NSCN (IM) ha Oklong.
Ki heh ophisar ki la ong ba ki khubor syntiat bad ki jingthoh ha ki social media ki pyni ba ki kaikhkaw kiba don tiar ki ïaid shabar jong ka ktem da kaba rah ïa ki tiar ïaleh bad phong ïa ki uniform, kaba paw shai ba ka long ka jingpynkheiñ ïa ki kyndon Ceasefire Ground Rules.
La pyntip ruh sha ka Ceasefire Monitoring Group (CFMG) shwa ban sdang ia ka jingkhynra.
Katba ki shipai Assam Rifles ki dang leit shajan ka shnong Makuilongdi bad Oklong, ki la shah khanglad ha ki nongshong shnong jong ka thaiñ, kynthup ki kynthei.Ki bor pahara ki la ong ba ki shipai ki la pyndonkam ia ka jingpyrkhing bad ki la pynthikna ia ki nongmih khmat jong ka thain ba katei ka jingkhynra ka long tang ban pynneh ia ka jingpahara bad ba kin ym rung sha kano kano ka shnong khlem ka jingmynjur jong ki bor pyniaid.
Hynrei ka jinglong jingman ka suk ka sain ka la nang synjor shuh shuh ha ka por kumba 9 baje eiei mynmiet, ha kaba ki paidbah kiba bun ki la ia lum lang ha sor Senapati bad ki la iaid paidbah sha ka ktem jong ki shipai Assam Rifles.Watla ki kynhun talasi ki la dep ban weng noh, hynrei ki paidbah ki la poi ha katei ka ktem hadien kumba 30 minit eiei bad la kynnoh ba ki la sdang ban kawang maw, pynjulor ia ki jingdon jingem bad pyrshang ban thang ia ki bynta jong ka ktem.
Ki shipai Assam Rifles, ryngkat ka jingiatreilang bad ki pulit ka Manipur bad ki CRPF, ki la pyndonkam ia ka bor kaba duna tam, kaba kynthup ia ki bom pynsat khmat, ban pynpra ia ki paidbah bad ban khanglad ia ka jingjur shuh shuh.
Kawei ka kynhun jong ki paidbhur kala pynjulor ia ki kali jong ki shipai Assam Rifles.Ki heh ophisar ki la iathuh ba kawei ka kali rit ka la shah thang, ar tylli ki trok shipai ki la shah pynkylla bad shah pynjulor, bad la iathuh ba kawei ka kali paidbah ruh ka la shah thang.
Ki bor pahara ki la iathuh ba ym shym la don kano kano ka jingjia ba sngewsih ne mynsaw hapdeng ki riew paidbah ne ki bor pahara.
“Ka jinglong jingman ha Senapati mynta ka long kaba suk basain bad hapoh ka jinglah ban teh lakam.Ki jingpyrshang ki dang iaid ha ka jingiatreilang bad ki seng trei mon sngewbha bad ki bor pyniaid distrik ban weng ia ki jingeh bad ban pynneh ia ka jingiatylli ha ka imlang sahlang,” la ong uwei u heh ophisar.
.){kind=link}