Shillong, Naitung 14 : Ka Sohra Civil Sub-Division kala weng noh ia ka jingpyrrkhing bala pynjari ha kshaid Weisawdong hadien ba ki nongmihkhmat ka shnong Laitduh bad Umblai kila poi sha ka jingiasngewthuh jingmut halor ki jingiakajia.
Ka kshaid Weisawdong, kawei na ki jaka jngohkai ba leitkai bha ki nongjngohkai kaba don hajan Sohra, kala pawnam namar ka jingdon ia ka kshaid ba lai kyrdan bad ka ju khring da ki hajar ngut ki nongleitkai manla u snem.
U Sub-Divisional Magistrate Mark A Challam, ula pynsangeh noh mardor ia ka hukum hapoh ka kyndon 163 jong ka Bharatiya Nagarik Suraksha Sanhita (BNSS), 2023, haba pynpaw ba kam don shuh kano kano ka jingsyier ban mih ki jingkulmar.
Ia kane ka jingpyrrkhing la pynjari naduh ka 3 tarik Naitung ban tehlakam ia kano kano ka jingkulmar kaba mih na ka jingiakajia pud hapdeng kine ki artylli ki shnong ha katei ka jaka jngohkai ba pawnam tam ka Jylla.
Kat kum ka hukum, ki nongmihkhmat na baroh artylli ki shnong la shah khot sha ka jingialang da ki bor pyniaid ka Sohra Sub-Division, ha kaba kila iapynbeit ia ki jingiapher jingmut bad iamynjur lang ban pynneh ia ka suk ka sain.
Da ka jingweng noh ia ki jingpyrrkhing, baroh ki jingpyrrkhing bala pynjari da ka hukum ba hashuwa kin ym treikam shuh.
Ki bor pyniaid ka Sub Division kila pynshai ba kane ka jingweng ia ka hukum kan ym khanglad pat ia ki bor ba dei khmih ba kin shim ia ki sienjam kat kum ka ain lada don kano kano ka jingpynkulmar lane pynthut ia ka leit ka wan u paidbah.
