Shillong, Naitung 14: U Myntri Khynnah ka Sorkar Pdeng ba khmih ia ka Science & Technology, Earth Sciences bad Prime Minister’s Office, Dr. Jitendra Singh hynne ka sngi ula ong, hadien palat ia ka shiphew snem kala don ka jingkylla ha ka rukom treikam bad la pynduh noh ruh ia palat 2000 tylli ki kyndon aiñ ki bym don jingmut, ka India kala jam sha kawei pat ka bynta ban wanrah ia ka jingkylla ha ka rukom ai jingshakri lyngba ka Next Generation Administrative bad e-Governance Reforms.
Haba kdew ia ka jingiawer u Myntri Rangbahduh ka ri u Narendra Modi ia ka “Reform Express” ha ka por ba shimti ha ka sien kaba lai ban ialam ia ka sorkar, ula ong ba ki jingkylla jongka lawei kidei ban pyniasoh lang bad ka Artificial Intelligence, Cybersecurity, Digital Public Infrastructure bad ki rynsan kiba iadei bad ki nongshong shnong ban tei ia ka jinglong kaba biang, ka rukom ai jingshakri kaba lam khmat da ki kor teknoloji ban lah ban pynurlong ia ka jingangnud jong ka Viksit Bharat@2047.
U Dr. Jitendra Singh ula plie ia ka National Conference kaba ar sngi halor ka Next Generation Administrative and e-Governance Reforms, kaba la pynlong da ka Department of Administrative Reforms and Public Grievances (DARPG) bad ka Sorkar Meghalaya hapoh ka nongbah Shillong.
U Myntri Rangbah ka Meghalaya u Conrad K. Sangma, ka Secretary jongka DARPG ka Nivedita Shukla Verma, u Chief Secretary ka Meghalaya u Dr. Shakil P. Ahammed, u Additional Secretary DARPG u Puneet Yadav, ki heh ophisar jongka Sorkar Pdeng bad Sorkar Jylla, ki District Collector bad ki riewpawkhmat na kylleng ki bynta jong ka ri kila wan ban iashimbynta ha ka sngi sdang jong kane ka jingialang.
Haba pynpaw ba ki jingkylla ha ka rukom treikam ki long u budlum na ka bynta ban kyntiew ia ka roi ka par ha ka jingiaid lynti jong ka ri India, u Dr. Jitendra Singh ula ong, ba ka jingshakri ha ka synshar khaddar kala iaid bad kala don ka jingkylla kaba khraw hapoh ka jingialam u Narendra Modi lyngba ka nongrim jongka jingtreikam kaba khuid ba suba, kaba don ia ka jingai jingkhein, ka jingpynkup bor da ki kor Digital bad ka rukom pyniaid ia ki kam kaba long ha ka lynti kaba pynmih ia ka jingseisoh. Ula ong, ba ka sorkar, kala iaid suki pa suki na ki jingbuh ia ki kyndon pyrkhing sha ki jingpdiang sngewbha da kaba buh ia ki nongshong shnong hapdeng eh jong ka jingthaw ia kano kano ka polisi treikam bad ha ki kam ai jingshakri ia ki paitbah.
Ula pynkynmaw ba ia ki National Conference ha kaba iadei bad jingkylla ka Sorkar, mynta lah pynlong ha kylleng ki thain jong ka ri ym ban shu neh beit hajuh tang hapoh New Delhi, u Myntri ula ong ba kane ka rukom leh kala pynkhlain ia ka jingiatreilang hapdeng ka Sorkar Pdeng bad ki Jylla kaban plie lad ia ka jingiar jong ka jingsam mar kylliang ia ki khana jop ha ka rukom treikam.
Ula ong ba ka Shillong, ka don ia ka jaka kaba kyrpang ha kane ka lynti iaid bad ula pynpaw ia ka jingskhem jingmut ba kumba la pynbna mynshwa ia ka Shillong Declaration, kane ka jingialang kaba mynta kan kut ha ka “Shillong Declaration 2.0” ban pyniaid shakhmat ia ki mat jong ka jingwanrah ia ka jingkylla.
U Myntri ula ong, ba ka thain shatei lammihngi kala kylla long kum kawei na ki nongioh jingmyntoi kaba heh bha na ka jingiohi jngai jong u Myntri Rangbahduh ka ri u Narendra Modi. Ula pynkynmaw ba u Myntri Rangbahduh ka ri ula wan jngoh ia kane ka thain la palat ia ka 80 sien, kaba pyni ia ka jingshimkhia ia ka thain shatei lammihngi. Ula kdew ruh ia ka jingai jingroh kaba dang shen jong u
Myntri Rangbahduh ka ri ia ka Living Root Bridges ka jylla Meghalaya ha ka Mann Ki Baat, u Dr. Jitendra Singh ula ong, ba ka jylla kala long kum ka nuksa ia ki kam pynroi kiba la ialam da ki shnong ki thaw bad ula iaroh ia ka Sorkar kaba la shim ia ki sienjam, kynthup ia ka New Shillong Administrative City, kaba kynthup lang ia ki jingtei kiba katkum kane ka juk kaba mynta bad ka jingai jingshakri ka sorkar lyngba ka rynsan Digital bad ka jingpynwandur ia ka rukom treikam kaban neh slem bha.
Haba pynpaw halor ka jingaid lynti ka ri ha kaba iadei bad ka jingai jingshkri da ki kor Digital, u Dr. Jitendra Singh ula ong, ba palat 56 Klur tylli ki Jan Dhan Account, ki jingshakri kiba iadei bad u Aadhaar, Direct Benefit Transfer bad ka Unified Payments Interface kala wanrah ia ka jingiapher hapdeng ka jingiadei ki nongshong shnong bad ka Sorkar. Ka UPI mynta kala pyniaid shakhmat ia palat 18 Billion ka rukom phah pisa kaba man la ka bnai, kaba pynlong ia ka India kum ka nongialam ha ka pyrthei ha kaba iadei bad ka jingsiew lyngba ka kor Digital.
U Myntri ula ong, ba ka Department of Administrative Reforms and Public Grievances kala pynkylla ia ka Centralised Public Grievance Redress and Monitoring System (CPGRAMS) kum kawei na ka jingpyndonkam bha ia ki teknoloji ha kaba iadei bad ka rynsan jong ka jingpynpaw ia ki jingsngew bad ki jingeh. Ka jingpynpaw ia ki jingeh kala kiew na ka 2 lak ha u snem 2014 sha jan kumba 25 lak mynta, kaba pyni ia ka jingkiew ka jingshaniah ki paitbah ia ka sorkar kaba shimkhia. Ula ong ba kane ka rynsan kadei kaba la kyrshan da ka Artificial Intelligence lyngba ki Chatbot Services ha ki kyntien ki bapher bapher ha kaban pynneh ruh ia ka jingtreikam ki briew ha ki bynta kiba khatduh jong ka jingshimkhia ia ki jingpynsngew ban pynthikna ba kan don ka jingtreikam kaba ryntih bad ban sngewthuh ia kiwei pat.
U Dr. Jitendra Singh ula kdew ia ki katto katne ki kam kiba la leh thymmai da ka sorkar ha kine ki 10 snem kiba la dep, kaba kynthup ia ka Digital Life Certificates da kaba ithuh ia ki durkhmat, e-Office, Prashasan Gaon Ki Ore, ki jingiatreilang bad ka Sorkar Jylla bad ka National e-Services Delivery Assessment, ia kaba baroh kala pynkhlain ia ka jingkhuid jingsuba ha ka rukom treikam, ka jingiaid beit iaid ryntih bad ka jingai jingshakri ha ki jaka kiba don shaduh kyndong kynshrot eh.
U Myntri ula ong, ba ka rukom treikam ka sorkar kadei ban bteng ban iatreilang katkum ka jingkylla ki kor teknoloji bad katkum ka jingdonkam jong ka imlang sahlang.
Ula ong, ba kiba bun ki kyndon teh pyrkhing kiba lah rim bha kila iai bteng namar ba ym shim la don kiban khmih. Ka sorkar kala pynduh noh kumba 2,000 tylli ki kyndon ain ki bym don jingmut bad la pynmih bujli noh ia ki da ki rukom treikam kiba iadei bad ki paid nongshong shnong kaba long ruh kaba iahap bha bad ka bha ka miat kaba mynta ha ka jylla.
U Dr. Jitendra Singh ula ai nuksa ruh ha kabak I kyndon treikam kiba lah rim bha kila ktah ia ki nongshong shnong, pensioner bad ki nongtrei sorkar, la pynmih bujli noh da ka rukom treikam kaba suk bad kaba iahap bad ki briew.
U Myntri ula pynpaw ruh ia ka Special Campaign for Disposal of Pending Matters and Cleanliness, kaba la sdang ha u snem 2021, kaba la kylla long kum ka jingwanrah ia ka jingkylla kaba khraw ha ka rukom ai jingshakri bad ka rukom treikam. Kae ka Campaign kala lah ban pynmih haduh T.4,000 Klur lyngba ka jingpynduh noh ia ki marjot bad ki mar kiba lah rim bad la lah ruh ban pynkylluid ia ka jaka kaba 700 lak square feet jong ki jaka treikam bad kyntiew ia ka jingai jingshakri kaba paka ha kylleng ki ophis sorkar.
Ula iawer ia ki Jylla bad ki Union Territories ban shim mar kylliang ia ki rukom treikam kiba seisoh ha ki tnad treikam jong ka Sorkar, u Dr. Jitendra Singh ula ong ba ka jingwanrah ia ki jingkylla na ka bynta ka pateng ban dang wan, kadei ban pynleit jingmut halor ka Artificial Intelligence, ban plie lad ia ka jingpyniaid ia ki kam kiba iadei bad u paitbah, jingpyniasoh bad ki kor digital ha kaba iadei bad ka jingai jingshakri ia ki nongshong shnong, Cybersecurity, ka jingthaw ia ki polisi katkum ka jingdon ia ki sabut kiba biang bad ki jaka treikam kiba lah ban kyrda bad ban shimkhia ia ki jingtynjuh kiban mih.
Haba pynkut, u Myntri Khynnah ula ong ba ka National Conference kadei ban kylla long ka rynsan ban kyntiew ia ka jingiaid sted ka ri India ha ka synshar khaddar bad ka jingai jingshakri bad ban noh synniang ha ka rukom kaba don jingmut sha ka jingiohi jngi jong ka Viksit Bharat@2047 lyngba ka jingtreikam kaba kloi, kaba shemphang bad kaba iadei bad ki paid nongshong shnong.
