Shillong, Naitung 14 : Ka Meghalaya High Court kala bthah ia ka Shillong Municipal Board (SMB) ba kan aiti ia ki jingtip ba bniah halor ka jingshna bad jingsam ia ki dukan na ka bynta ki nongshong dukan madan ha phyllaw ka Brightwell Bungalow.
Haba bishar ia ka thup ki PIL ha ka sngi Nyngkong, ka Iingkashari ka Chief Justice Revati Mohite Dere bad Justice W Diengdoh, kala bthah ia ka SMB ba kan file ia ka affidavit ba pynpaw ba katno tylli ki dukan kin don, ha kaei ka jaka bad kaei ka por bala buh ban pyndep bad aiti sha ki nongshong dukan madan.
Ka Iingkashari kala bthah ruh ia ka SMB ban pynshai la ka phyllaw ka Brightwell Bungalow ka dei ka jingtei kaba la rim, hadien ka jingpyrshah da ki katto katne ki nongmudui.
U nongiasaid ain ki katto katne ki nongmudui ula pyntip ia ka Iingkashari k aka jaka ka don ia ka jaka kaba heh na ka bynta ki dukan bad ki jaka pynieng kali bad kim don ruh ia kano kano ka jingpyrshah ban pynkynriah ia ki nongshong dukan madan ha katei ka jaka.
La bthah ia ka SMB ba kan file ia ka affidavit hapoh ka Registry ryngkat ka jingai copy sha baroh ki kynhun liang mamla.
Ia kane ka mukotduma la buh ban bishar biang ha ka 29 tarik Naitung, 2026.
