Shillong, Risaw 06 : U Myntri Sorkar bad Chairman ka Regional Committee ka West Khasi Hills District Bah Renikton L Tongkhar hynne ka sngi palei, ula pyntip ba shen un sa khot noh ia ka jingialang ba nyngkong jong ka Committee ban iasyllok halor ka kam pynbeit pud.
“Ka jingialang ba nyngkong jong ka Regional Committee kan sa long noh shen ban shim ia ki jingai jingmut na baroh ki kynhun bapher bapher” ong u Bah Renikton haba iakren bad ki nongthoh khubor.
U pyntip ruh baka Regional Committee kala dep pynrung dkhot ruh ia ki briew na ki District Council, ki Khlieh Nongsynshar bad ki Sengbhalang.
Kine ki kynthup ia u MDC ka Nongstoin Bah Gabriel Wahlang, Legal Adviser ka KHADC bad President ka HYC Robertjune Kharjahrin, Syiem ka Hima Nongmynsaw, Acting Syiem ka Hima Nongmynsaw, Rangbah Shnong ka Hima Nongmynsaw, bad uwei u nongmihkhmat naka seng KSU, FKJGP, HYC, WKSU, HANM, West Khasi Hills District bad ki Rangbah Shnong ka Hima bad Raid Nongmynsaw.
U Bah Renik ula pynpaw ia ka jingsngew skhem ba ka Jylla Meghalaya kan ioh bun eh ki Shnong kiba hap hapoh ka Langpih Sector ha kane ka jingiakren pynbeit pud jong ka wat kaba ar.
