SHILLONG, JUL 10: U Myntri ka Tnad Jngohkai u Timothy D Shira ha ka sngi Thohdieng ula pynksan ia ka jingthmu ka sorkar ban tei ia ka Facilitation bad Tourist Registration Centre ha Umling, bad ong ba ka dei kaba la shna da ka jingthmu ban pyrkhing ia ka jingrung ki briew sha Meghalaya bad ban tehlakam ia ka jingwan rung kyrthep ki briew kiba nabar.
Kane ka jingkren u Myntri kala mih hadien ka jingpyrshah ka Khasi Students’ Union (KSU) ia ka jingtyrwa ban tei ia ka Food Court ha ka Umling Entry Point.
“Ngam kwah ban ong eiei, namar lada nga ong eiei kan sa kylla long pynban ka jingmih jong ka jingkynthoh shuh, kumta ngam kwah ban ong eiei” ong u Shira ha kaba iadei bad ka jingpyrshah ka KSU.
Haba batai shaphang ka jingthmu jong katei ka jingtei, u Shira ula ong ba katei ka jaka kan ai artylli ki jingshakri kum ka Facilitation Point bad ka jaka Register ia ki nongjngohkai kiba wan shapoh ka jylla.
“Ka jingthmu ka jong ngi ka long ban don ia ka Facilitation Centre ryngkat bad ka jaka ban Register ia ki nongjngohkai. Ha ka plan ka jong ngi kin don ar tylli ki kamra ban trei ia ki kam ophis kum ka jingrejister ia ki nongjngohkai. Ha ka por ba leh ia ka Registration kan don ka jingshim por, kumta ha katei ka por kumno ki kwah ban pynlut ia ka por katba ki dang ap ban register kin lah ruh ban pynsngewtynnad ialade. Kumta ngin pynbiang ia ki jingdonkam kum ka Restaurant. Kan dei tang kumtei hi” ula ong.
U Myntri ula banjur ba ka jingphah register ka long kaba donkam ban pynshisha ia ka jinglong bad ia ka jingthmu jong ki nongwankai.
“Hooid kane dei ka Tourist Registration Centre. Phi iohi ha ka kyrteng jong ki nongjngohkai, bun ki briew ki wan ban leh eiei, kumta ban khmih bniah ia ka jingthmu ka jongki, la ki wan kum ki nongjngohkai da ka jingthmu kaba bha, ne ki wan ha ka rukom kaba artatien ban leh ne buh jingma, kane ka long kaba kongsan ia ngi. Ngi hap ban khmih bniah ia ki kot ki sla ki jongki la kidei shisha ki nongshong shnong ba pura ka ri India ne na kiwei pat ki ri bad ki don ne em ia ki kot ki sla kiba paka” la ong u Shira.
Ula pyniasyriem ruh ba katei ka jingpyrkhing ban rung shapoh ka jylla kan long kumba leh da kiwei pat ki jylla, bad ka bynrap, “Phi iohi, ka jan long kum ka ILP. Haba ngi leit sha Nagaland, baroh kin hap ban iaid lyngba ka rukom treikam jong ka ILP”.
U Shira ula ong, ba katei ka rukom treikam kadei kaba la leh ruh ha kiwei kiwei ki jylla.
“Wat ha Garo Hills ruh, ngi lah tei ia ka iing ha Berubari. Katei ruh kan treikam ha katei kajuh ka rukom. Ngin don ia ki Restaurant bad ha kajuh ka por kin don ruh ki Registration Officer ban khmih ia ki nongjngohkai kiba wan la ki don ne em ia ki kot ki sla kiba biang” ula ong.
Halor ka jingkynnoh ba ka sorkar kam don satia ia ki atiar ban tehlakam ia ka jingwan rung kyrthep ki briew kiba nabar, u Myntri ula ong, “Mano ba ong, ba ka sorkar kam don ia ka atiar kaba biang ban khmih bniah ia ka jingwan rung kyrthep ki briew kiba nabar?. Mynta kala don ka Infiltration Check. Sa kaei pat ka rukom khmih ne Check kaba donkam? Mynta ngi don ia ka Infiltration Check Gate sa bad kane ka jingphah leh ia ka Registration. Kumta sa kaei de?” ula buh jingkylli.
Ha kaba iadei bad ka jingpyrshah ka KSU, u Shira ula ong, ba kan sa don ka jingiakren ha ka kyrdan bad ki heh ophisar.
“Ha ka jingshisha ha ka kyrdan jong ki ophisar ka lah don ka jingiakren. U Deputy Commissioner ula khot ia ki dkhot jong ka KSU bad ula kyrpad ia ki ba kin ym pynthud ia katei ka kam. Hynrei kaei ka rai kaba kila shim kadei kaei kaei kaba ngam tip satia” ula ong.
Ula bynrap ba katei ka mat kaba iadei bad Umling Entry Point kadei ruh kaba dang don hapoh ka jingshah tian bishar ha ka iingkashari.
“Kaei kaei kaba iadei bad ki kyndon jongka iingkashari, kumta ka Sorkar Meghalaya ka lah dep ban ai ia ka jubab” ong u Shira.
