Shillong, Naitung 08 : Ka Kynhun Myntri ka Sorkar Jylla ha ka sngi Balang, kala ai jingmynjur ia ka song pisa sa T.36 klur ban tei ia ka IT Park Building kaba ar ha Umsawli, ka ban ai jaka ia kham bun ki kompani bad ban buh ia ki jingdonkam kiba thymmai.
Haba kren sha ki nongthoh khubor hadien ka jingialang, u Myntri Rangbah Conrad K Sangma ula ong ba kane ka project kala jan dep artad hapoh ka jingmang pisa ba nyngkong kaba long palat T.120 klur, hynrei ki dang don bun ki kam kiba hap ban pyntrei khnang ba kan long kaba la khreh ban ai jaka ia ki kompani kiba nabar ri.
“Kumba phi iatip, ka IT building kaba ar kala jan dep artad. Ka jingmang tyngka ba nyngkong ka long T,120 klur tam ia kane ka project bad kane ka bynta ka dei kaba la lah ban pyndep” ong u Conrad haba iakren bad ki nongthoh khubor.
Haba kdew ia ka jingtyrwa na ka Tnad IT, ula ong ba ia ki jaka bym pat pyndonkam ha kane ka building yn sa pyndonkam noh ban buh ia ki tiar ki tar kiba donkam.
“Ki dang don bun ki jaka kiba dang lait bad ka Tnad IT kala tyrwa ba dei ban pyndonkam noh ia ki ban buh ia ki jaka trei kam kiba la pynbit pynbiang nadong hadong. Ha kajuh ka por, ka cafeteria kaba heh dei ban tei nalor ka auditorium kaba heh” ula ong.
Kane ka jingpynheh kan kynthup ruh ia ka jingbuh ia ki air confition, ka jingdawa ba hakhmat eh na ki nongshim wai.
Ia kane ka jingmang tyngka ba thymmai la bishar bniah da ka Tnad Planning bad Finance hashuwa ban wanrah hapoh ka Kynhun Myntri.
U Myntri Rangbah u ong ba kane ka kam kala wan sha ka Kynhun Myntri hapoh ka Policy ba thymmai kaba donkam ia ka jingmynjur ia kino kino ki project kiba pynheh ia ka jingpynlut da palat 25%.
