Shillong, Naitung 08: Ka Hynniewtrep Youth’ Council (HYC) ka la kynnoh ba ka Sorkar Jylla bad ka Ophis Defence Estate kila leh bym suidniew, da kaba kynnoh ba ka jingbym shimkhia jong ki ka la ailad ia ka Lum Survey kaba don hapdeng jong ka nongbah Shillong ban kylla long kum ka jaka sah beain, ka jingkhaii drok bad ki kam runar.
Ha ka kyrwoh khubor u President ka HYC Bah Roy Kupar Synrem u la ong ba katei ka jaka ka la kylla stet kum ka jaka kaba khlem aiñ bad ka jaka ba mih ki nongkhaii drok, ki kam khaii beian, bad kiwei kiwei ki kam runar.
Ka HYC ka la kyntait ia ka jingkam ba katei ka jaka ka dang don hapdeng ka mukotduma kaba la pynsangeh teng ban beh iaki ba wan sah beain.
“Ka jingiai kam ba katei ka jaka ka dang don hapdeng ka mukotduma long kaba ialam bakla bad kaba ym lah ban pdiang” la ong ka HYC.
Ka HYC kala kdew ba ka mukotduma ka dei tang 3 ngut ki briew kiba iakhun daka ba kam trai iaka jaka bad kane kam dei ban long ka daw ban nym lah ban weng ia kiwei kiba wan buhai shnong beain ha kiwei ki bynta jong ka Lum Survey.
Katkum ka jingong jong ka HYC, ki bynta kiba heh jong ka jaka Sorkar bad ka jaka Shipai ha Lum Survey la shah shim kabu da ki nongshong shnong beaiñ bad mynta la pyndonkam ïa ki kum ka jaka rieh tngen na ka bynta ki kynhun ki nongleh kam sniew.
Ka HYC ka la ong ba kane ka buh jingma kaba khraw ïa ki jaka ba marjan bad ïa ki samla jong ka nongbah Shillong.
Ka kynnoh iaki bor badei khmih ba kidei ban shim ia ka jingkitkhlieh halor ka jinglong jingman jong ka Kum Survey.
“Ka jingkynnoh ka leit beit sha ka Sorkar Jylla bad ka ophis Defence Estate namar ka jingsngap jar, jingbym shimkhia, bad jingbym leh eiei jong ki. Ka jingbym leh eiei jong ki ka la plie lad iaki kynhun leh kam sniew ban kam trai iaka jaka paidbah ha Lum Survey bad ka la ailad ïa ki kynhun runar ban roi ha katei ka jaka” ong ka kyrwoh.
Ka la dawa ban pynkynriah noh mardor ïa baroh ki nongshong shnong beaiñ kiba shong ha kito ki bynta jong ka jaka ha Lum Survey iaki bym shah kynthup ha ka mukotduma kaba dang sahteng ha ka ïingbishar.
Da kaba maham ba kan leh daka ba tyngeh, HYC ka la ong bi bor badei khmih bad ka Sorkar kim lah shuh ban pynslem.
“Ka por ban ai daw ka la kut noh. Lada ka Sorkar bad ka ophis Defence Estate kim lah ban leh mardor, ka HYC kan hap ban leh katkum ka jingdonkam ban pynbor iaki ban shim ka jingkitkhlieh”.
Ka HYC ka la bynrap ba lada ki heh Sorkar “ki dang ïai bteng ban long ki nongpeitkai, kidei ban shim ka jingkitkhlieh na ka bynta ka jingbym don aiñ, ka jingbymshngaiñ, bad ka jingpynjot ïa ka imlang sahlang namar ka jingbym lah jong ki ban pyntreikam ïa ka aiñ.”
