Shillong, Naitung 08 : U Myntri kam Pohiing ka Ri Amit Shah ula kular ia ki Nongialam Balang na Meghalaya bad ka thain Shatei Lamm Mihngi ba un sa shong bisahr ia ki jingsngewkhia jong ki halor ka Foreign Contribution (Regulation) Act (FCRA) amendments, ong u Myntri Rangbah Conrad K Sangma ha ka sngi Balang.
U Conrad u iathuh ba ula ialam ia ka kynhun ki Nongialam Balang ban iakynduh ia u Amit Shah ha Delhi.
“…..ha ka jingialang, la synran ia nga da ki nongialam na ki Balang bapher bapher, na Meghalaya bad katto katne na kiwei pat ki Jylla ka thain Shatei Lam Mihngi, Ngi la iakren bniah bha halor ka Amendment jong ka FCRA Act” ula ong.
“Ka jingialang ka long kaba sngewgynnad bha ba kila don bun ki jingsngewkhia kiba la pynsngew hakhmat u Amit Shah….u Amit Shah ula shimkhia ban batai ia baroh ki bynta bapher bapher jong ka Amendment” ong u Conrad.
U Amit Shah ula kular ba un sa buddien ia kane ka kam bad khot ruh ia ka jingiasyllok shuh shuh.
“Ula kular ba un sa khmih bniah ia man ki mat bala pynsngew, iakren bad sa ai ka jubab sha ngi. Nalor kata, ula rai ruh ban khot ia ki nongialam Balang na ka thain Shatei Lam Mihngi ha kine ki artatien ban wan, ha kaba u Home Secretary un iashong bad ki Nongialam Balang ban sngap ia ki jingsngewkhia ba ki don, bad ban leh eiei ia kine” ula ong.
