Shillong, Naitung 08 : U Myntri Rangbah ka Jylla Conrad K Sangma ha ka sngi Balang ula iathuh ba ka Meghalaya kala tyrwa ban tih dewiong da kaba khlong tunnel ba pyndonkam ia ki kor technology kum ka lynti ban bujli ia ka jingtih open cast, haba kdew ia ki jingeh ha ka pisa pilain bad ki jingbym lah ban leh da ki nongtih par trai shnong.
Hadien ka jingialang bad u Myntri ka Ministry of Mining ha Delhi dang shen, u Conrad ula ong ba ka Jylla ka kwah ban pynbteng ia ka jingtih par da kaba khlong tunnel hynrei ryngkat bad ki lad jingshngain ka juk ba mynta.
“Kumta, kaei kaba ngi iakren ka long ba lada lah ban shah tih par da kaba khlong tunnel ha ka rukom ba lah ban pyndon kam iaki technology kum ka 3D mapping ia ki jaka kiba don jingma, ki jaka kiba ki nongtih par ki lah ban rong, bad ki lad ki lynti kaba lah ban iada ia ki par bad shna pynskhem ia ki da ki jingtei” ula ong.
Ula bynrap ba ki machine kiba lah ban thied bad ki technology bala pyndonkam ha kiwei pat ki ri, ki dei kiba lah ban pyndonkam lang hangne.
“Lada ngi lah ban wanrah ia kine ki technology…bad pynthikna ba ngin lah pynduna ia ki jingma, kane ka dei kaei kaba ngi la tyrwa” ong u Conrad.
U Myntri Rangbah ula ong ba ka jingtih par open cast ka dei kabym iahap satia hapoh ka Jylla.
Halor ki jingbuh kyndon, u Conrad ula ong ba ka kyndon ba 100 acre hapoh ka MMDR Act ka dei ka bym iahap satia bad ki nongtih dewiong jong ki par kiba rit. U Myntri ka Sorkar Pdeng ula mynjur ban sa shong bishar ia kane ka bynta.
“Ula mynjur ba, hooid, 100 acre kam dei kaei kaei kaba iahap na ka bynta ki nongtih par trai shnong bad kumta, ngi hap ban shong bishar biang ia ka” ula ong.
U Myntri ula bthah ia ki Ophisar ka Coal Ministry bad ki Ophisar ka Sorkar Meghalaya ba kin iakynduh ha kine ki 10 sngi ban wan ban iashimrai ia kane ka jingtyrwa.
“U Secretary ka Coal Ministry bad Additiona Secretary bad ki OPhsar na ka Sorkar Meghalaya kin hap ban iashong…..bad iathir iatai halor kane ka kam” ong u Conrad.
Ka Jylla kala kyrpad ruh ban aiti ia ka bor ai jingbit hapoh ka kyndon 26 jong ka MMDR Act sha ka Jylla.
“Ngi la kyrpad ba ka kyndon 5(1), kaba ailad ban ai jingmynjur ia ki kot ki sla bapher bapher bad ki mining plan….ban aiti noh sha ka Sorkar Jylla da kaba pyndonkam ia ka bor jong ka kyndon 26” ula ong.
