Shillong, Naitung 08 : Ka Kynhun Myntri ka Sorkar kala ai jingmynjur ia ka jingtyrwa ban thied ia ka aka ba 3.972 acre ka jaka ha Thad Muthlong, Laskein Block, West jaintia Hills na ka bynta ban tei ia ka karkhana tylliat shynrai Lakadong lane ka Integrated Turmeric Processing Plant.
Haba pyntip ia kane hadien ba dep pyniaid ia ka jingialang ha ka sngi Balang, u Myntri Rangbah Conrad K Sangma ula ong ba ia kane ka project la wanrah halor ka jingbthah ka Sorkar Pdeng ia ki Jylla ka thain Shatei Lam Mihngi ba kin ithuh bad kyntiew ia uwei na ki mar ba pynmih na ki Jylla.
“Ha ryngkat ka jingiasyllok bad ka DoNER Ministry, u shynrai u dei u mar bala jied na ka bynta ka Meghalaya” ula ong.
U Myntri Rangbah u iathuh ba ia kane ka karkhana yn tei ha ka jingmang pynlut ba kot T.187 klur, da ka jingkyrshan ka Sorkar Pdeng ia kiba bun ki jingpynlut.
“Ka dor jong ka project baroh kawei ka long T.187 klur, ha kaba ka DoNER Ministry bad ka Agriculture Minister kila ai ia kaba bun ka pisa. Ka jingkhein ba thikna ka don bad nga, hynrei ka kot kumba 70-80% ka pisa kaba wan na ki,bad tang kumba T.30-T.35 klur la kynshew da ka Sorkar Jylla” ong u Conrad.
Ban pyniaid shakhmat ia ka project, ka Kynhun Myntri kala ai jingmynjur ban thied ia ka jaka ha ka dor ba T.1.7 klur.
“Ia kane ka jaka la ithuh na ka bynta ka Integrated Lakadong Turmeric Processing Plant ban sa tei. La shim ia ka rai ban jied ia ka jaka ba 3.972 acre ha ka dor ba T.1.7 klur” ula ong.
U Conrad u ong ba u shynrai Lakadong u dei uba lah ban pyniaid iew bha bad kane ka karkhana kan ai jingmyntoi bha beit beit sha ki nongrep.
