Shillong Naitung 06: Ka Synjuk ki Nongsynshar Shnong ka Bri u Hynniewtrep bad ka Synjuk ki Rangbah Kur ka Bri u Hynniewtrep kala shim ia ka rai ban dawa na ka Khasi Hills Autonomous District Council (KHADC) ba ka dei ban phah pynphai noh ne Recall ia ka Amendment Bill 2026 jongka Khasi Hills Autonomous District (Regulation and Administration of Land) Act 2021 kaba la phah sha u Lat Ka Jylla ban ioh jingmynjur.
Kine ki synjuk kila shim ia katei ka rai ha ka sngi Baar ha ka jingialang kaba la lum ha nongbah Shillong.
U General Secretary ka SNSBH Bah RL Blah ula ong, ba ka jingialang kala shim ia ka rai ban pyrshah jur ia ka Amendment Bill 2026 bad dawa ba dei ban weng noh ia ka ‘Notification’ bad ban phah pynphai biang ia ka Bill kaba la phah sha u Lat ka Jylla.
“Ka Synjuk kan phah ruh da ka jingthoh sha baroh ki shnong ki bad ki Hima ban ai ka jingiatreilang bad kan leit ruh ban iakynduh ia u Lat ka Jylla, u Myntri Rangbah ka Jylla, u Symbud Myntri Rangbah ka Jylla uba khmih ia ka District Council Affairs” ula iathuh.
U Bah Blah u pyntip ba ki Synjuk kin sa ai ruh da ka jingthoh sha u Chief Executive Member ka KHADC halor ka Resolution kaba la shim da kine ki Synjuk.
Haba batai ia ka dawbah kaba la pynlong ia kine ki artylli ki Synjuk ban pyrshah, u Bah RL Blah ula ong, “Ka synjuk ka pyrshah jur halor ka nongrim ba ka Executive Committee jong ka KHADC kala pynduh noh ia Clause 16 bad kala weng noh ia ka kyntien “Da kaba iasyllok bad ki Dorbar Shnong, Dorbar Raid bad ki Dorbar Hima” ha ka Amendment Bill kaba thymmai”.
“Ka Synjuk kam pyrshah ia ki jingshim khia ka District Council ban iada ia ka khyndew ka shyiap bad ka Synjuk kan iadon ryngkat lang bad ka District Council hynrei ban ong pat, ban ym donkam shuh ban shim ia ka jingiamir jingmut bad ki Dorbar Shnong, Dorbar Raid bad Dorbar Hima kadei kaei kaei kaba kim lah ban pdiang satia” ula ong.
“Kat kum katei ka Bill, ia ngi yn ym ithuh shuh bad kan khmih bad pyniaid hi noh da ka District Council marwei haba iadei bad ki kam jaka bad ngi pyrshah jur ia kane” ula bynrap.
Nalor kane, ula ong, ba ka Synjuk kan ym leit hi nalade ban iakynduh ia ka Executive Committee jong ka KHADC, namar ba ka KHADC ruh kam shim la iasyllok eiei bad ki Khlieh Nongsynshar hashwa ba kan pynkylla ia katei ka kyndon aiñ, hynrei lada ka KHADC hi ka khot iakren ia ki kumta kin sa leit ban iakren halor katei ka mat.
“Ia mynta ngin peit shwa ia kaei kaban sa mih ha kine ki sngi kiban wan bad ngin peit ia kaei ka jubab kaba kin ai na ka liang ka jongki” la pynkut u Bah Blah.
 ba ka dei ban phah pynphai noh ne Recall ia ka Amendment Bill 2026 jongka Khasi Hills Autonomous District (Regulation and Administration of Land) Act 2021 kaba la phah sha u Lat Ka Jylla ban ioh jingmynjur.){kind=link}