Shillong, Naitung 06 : Ka Jaintia National Council (JNC), Khliehriat Circle ha ka sngi Nyngkong, kala buh da ka jingujor sha u Deputy Commissioner ka East Jaintia Hills, haba kynnoh ia ka jingpulom kaba jur ha ka jingpyntreikam ia ka Supplementary Nutrition Programme hapoh ka District.
Hapoh ka jingialam u Working President Diamon Bareh, ka Seng ka ong ba ki khynnah hapoh 6 snem bad ki kynthei ba armet bad ba ai buin khun, kila shah pynduh ia ki jingbam tei met ba man ka por, kaba long kat kum ki kyndon bala buh da ka Sorkar.
Ha ka dorkhas bala aiti sha u DC, ka JNC kala pynpaw ba kat kum ki kyndon, ki nongioh bynta ki dei ban ioh ia ki jingbam tei met na ka bynta 25 sngi ha ka shibnai, kaba kynthup ia ki jingbam bas het man ka sngi kaba dang khluit bad ki jingbam dih sha ba mynstep na ka bynta ki khynnah kiba don hapdeng 3-6 snem ha ki Anganwadi Centre.
“Ha ka jingshisha, ha bun tylli ki shnong ha ka thain Khliehriat, ia ki jingbam la sam tang shisien ha ka shi bnai, arbnai lane lai bnai duh, bad kam ju don ka jingsam ia ki jingbam bala shet ba dang khluit ne jingbam dihsha mynstep na ka bynta ki khynnah” ong ka Council.
“Kane kam dei ka jingduna ha ka rukom pyniaid kam, ka dei ka jingpynduh ia ka hok ban ioh ia ki jing bam tei met” kala bynrap.
Ka JNC kala ong ba ha ka jingiakren bad u/ka CDPO ka pyni ba ia ki marbam la pynpoi sha ka District tang shisien ha ka ar lane lai bnai, kaba buh ha ka jingeh ban bud ia ki kyndon.
“Lada ka long kaba shisha, la pyni pyrthei ia ka jingbymbiang ha ka jingpyniaid kam hapoh ka Jylla/Directorate. Lada kam dei, ka pynmih ia ka jingkylli halor ka jingleh hok ha ka jingpyntreikam bad jingai jingtip. Ha baroh ar kine kiei kiei, ki dei ki khynnah bad ki Kmie ka East Jaintia Hills kiba shah ktah” ong u Bah Bareh.
Ka Council kala dawa ia ka jingtohkit kaba buh da ka por halor ka jingpyntreikam ia ka SNP hapoh ka District.
“Ngi la dawa ia ka jingkhein ba man u bnai ia ka jingpdiang ia ki marbam na ka Jylla bad ka jingsam bala phah sha man ki Anganwadi Centre” ong ka JNC.
Kala dawa ia u Deputy Commissioner ban pynthikna ha kaban tynrong ia ka jingkitkhlieh, la ka dei ha District lane ha Jylla, bad ban shim ia ki sienjam ban pynbeit mardor khnang ba kane ka skhim kan treikam kumba la kular ha ka policy, ym tang ha ki jingthoh.
Ka JNC kala ong ba kan iai bteng ban peit thuh ia kane ka kam.
Ka Seng kala dawa ia ki bor District ban leh eiei kyrkieh ha kaban pynbiang ia ka jingsam jingbam tei met hapoh ka SNP ha baroh ki Anganwadi Centre ha East Jaintia Hills.
, Khliehriat Circle ha ka sngi Nyngkong, kala buh da ka jingujor sha u Deputy Commissioner ka East Jaintia Hills, haba kynnoh ia ka jingpulom kaba jur ha ka jingpyntreikam ia ka Supplementary Nutrition Programme hapoh ka District.){kind=link}