Iarap ka sticker ha jingkhang ban iada ia kiba armet
Shillong, Naitung 06 : Ha ki shnong ka Ri-Bhoi District, ki sticker ba malu mala ba tah ha khmat jingkhang jong ki Longiing kila kylla long ki atiar kiba khlain bor bha ban iakhun pyrshah ia ka jingiap ki longkmie ha ka por ba kha khun.
Ka sticker “Husiar Ko Kmie”, bala shna hapoh ka Maternal, Newborn bad Child Health-Human Centred Design (MNCH-HCD) project, kala iarap ia ki Accredited Social Health Activist (ASHA) ban ithuh kham kloi ia ki Longiing ba don ki longkmie kiba armet kiba don ha ka jingshisha bad ban pynthikna ba kine ki longiing kin shimkhia mardor haba khie kynsan ka jingshitom.
Ia kane ka project la pyntreikam mynta hapoh ka Umling Block jong ka Ri-Bhoi District.
Ha ka jingleit leh Antenatal Care (ANC), ki ASHA ki peitthuh ia ki longkmie ba armet bad buh ia ki risk bank ba airong ha ka sticker hashuwa ban tah hapoh ka jingkhang ne ka kynroh jong ka Iing. Kane ka sticker ka iathuh ia ki bahaiing hasem la kane ka jingpun khun ka donkam ne em ia ka jingleit phah khmih doktor ba man ka por, aidak ia ki jingma, lane ka dei ka medical emergency, haba pyni ruh iano ba dei ban phone mardor, kynthup ia ki nongtrei ASHA, ki kali 108 Ambulance lane ka Chief Minister’s State Motherhood Scheme (CM-SMS).
Ka sticker ka treikam ruh kum ka card ban pyni ia ki dak ka jingma. Ka batai ia ia ki dak jingma ba kyrpang ha ka- ka jingphlei snam, ka jingsuh, ka jingbym don jingkhih jong u Khunlung hakpoh, ka jingbyrei ki khmat bad kiew jingshit- khang ba wat ha ka jingbym don ki ASHA, ki bahaiing ki lah ban ithuh ia ka jingdonkam kyrkieh ban leh eiei mardor, ha ka jaka ban ai ia ki nongtrei ka koit ka khiah ba kin batai ia kaei kaba jia.
Ki Heh ka tnad ka Koit ka Khiah ki ong ba kane ka buit treikam ka iarap bha ha ki jaka kyndong bad ki jaka ba shah riat jong ka Jylla Meghalaya, kaba ka jingslem ban ithuh ia ki dak jingma lane ban poi sha ki jaka sumar ka lah ban wanrah ia ka jingjia ba sngewsih.
Da kaba buh ia ki jingtip ba kongsan ha ka jaka ba ki bahaiing baroh ki lah ban iohi man ka sngi, ka sticker ka pynlong ia ki dak jingma kaba kham suk ban sngewthuh, pynduna ia ka jingpynslem ha kaban wad ia ki lad jingsumar, pynkhlain ia ka jingshaniah hapdeng ki ASHA bad ki Longiing bad pynskhem biang ia ka jingphah rah sha ki jaka sumar ha ki jaka kiba jynjar ban poi.
Ym kum ki kot ki sla ba ai jingsumar ba ju leh baroh shikatta kiba shu sahkut tang ha ki register ne file, ka sticker ka buh ia ki jingtip ban iada ia ki jingim ha ki jaka ba lah ban iohi paidbah hapoh ka Iing, kaba pynshlur ia ki bahaiing ban leh eiei mardor haba don kano kano ka dak jong ka jingma.
Da ka jingpynwandur ha ka rukom ba wat kiba duna ka jingpule ruh ki lah ban sngewthuh, ka sticker ka pyndonkam ia artylli ki ktien Khasi-English.
Ia kane ka sticker la shna da kaba pyndonkam ia ka Human-Centred Design ne ka jingpynshong nongrim ha ki briew, ryngkat ki jingai jingtip na ki nongtrei ka Koit ka Khiah, ki dkhot ka imlang sahlang bad ka State Health System Resources Centre (SHSRC), Meghalaya, kaba pynthikna ba kaba lah ban leh bad kaba suk ia ki longiing ha nongkyndong ba kin pyndonkam.
Ia kane ka project la kyrshan da ka Sorkar Jylla, SHSRC Meghalaya, Blockchair for Impact (BFI), IHCRF bad UNICEF India. La pyntreikam ia ka da ka Tattva Foundation ha ryngkat ka jingiatreilang bad ka NHM Meghalaya nalor ka jingkyrshan ka Assam Don Bosco University, Guwahati bad ka Indian Institute of Technology Bombay.
