Mon, Naitung 6: Ka sorkar kmie ka la pynthikna ban pynbha ia ki jingtei, ki ban pynkhlain ia ka jingpeitngor bad ban wanrah ki kam pynroi ba kham sted ia ki shnong kiba don ha khappud India-Myanmar hadien ba u Myntri Khynnah ki kam Pohiing Nityanand Rai u la bishar bniah ia ka jingshngain ha ka District khappud jong ka Nagaland ha Mon ha ka sngi Saitjain.
Ha ka jingleit jong u ia ka Mon District bad ia ka shnong khappud kaba kongsan jong ka Longwa, u Rai u la ong ba ia ki jingeh jong ki nongshong shnong khappud yn sa rah sha ki tnad ba dei peit, da kaba pynpaw biang ia ka jingangnud jong ka Centre ban pynkhlain ia baroh ar ka jingpahara bad ka roi ka par ha ki jaka khappud.
Ha ka jingsynran lang jong u S. Phangnon Konyak bad ki heh ophisar jong ka Assam Rifles, u myntri u la bishar bniah ïa ki jingpynkynriah kam ha Mon bad Longwa, ha kaba u la ïakynduh bad ki shipai bad ïaroh ïa ka bynta jong ki ha kaba pahara ïa u pud u sam pyrshah ïa ki kam runar kiba ïaid lait luit, kynthup ïa ka jingkhaïi drok, ka jingïaid beaiñ bad ka jingrung tuh.
Ka jingïakren jong kane ka jingleit jngoh ka long ka jingïakren jong u Rai bad ki nongialam shnong ha Longwa, kawei na ki shnong khappud ba pawnam tam jong ka India ha kaba u pud u sam jong ka international boundary lyngba ka jaka shong jaka sah. Ki nongshong shnong ki la aiti ia ki dorkhas kiba batai ia ki jingdawa kaba la ap slem, kynthup ia ka jingpyniasoh surok kaba kham bha, ka jingpynbha ia ki jingshakri ha ka koit ka khiah, ka jingpynbiang ia ka mobile network, ki lad kamai, ki jaka pule bad ka jingpyntreikam kaba paka ia ki skhim jingiarap jong ka sorkar pdeng.
Ki nongmihkhmat jong ka imlang sahlang ki la wad ruh ia ka rukom treikam kaba la pynbeit ryntih na ka bynta ka jingleit jingwan shabar jong u pud u sam kaba pynneh pynsah ia ki jingiadei tynrai ha ka imlang sahlang bad ka kolshor jong ki paidbah ha khappud katba ka pynthikna ia ka jingshngain jong ka ri.
Haba jubab ïa ki jingdawa, u Rai u la pynthikna ïa ka kynhun ba ka sorkar pdeng kan buddien ïa ki mat bad ki tnad ba dei peit bad kan bteng ban buh hakhmat eh ïa ka roi ka par jong ki thaiñ khappud. U la ong ba ka sorkar, lyngba ka Vibrant Villages Programme, ka trei ban pynbiang ia ki jingtei kiba kham bha bad ki jingshakri paidbah katba nang pynkhlain shuh shuh ia ka jingpahara ha shilynter ka khappud India-Myanmar.
U myntri u la pynlong ruh ia ka jingiakren bad ki bor synshar district, ki seng bhalang bad ki bor synshar shnong halor ka jingpynbha ia ka rukom pyniaid ia ki khappud bad ban pynsted ia ki jingthmu halor ki kam pynroi ha ki jaka khappud ba kyndong.
U MP jong ka Rajya Sabha u Phangnon Konyak u la ban jur ïa ka jingdonkam ban don ka jingïatreilang kaba jan hapdeng ka sorkar kmie, ka sorkar Nagaland bad ki jaka treikam ba marjan ban weng ïa ki jingeh ba ki jaitbynriew kiba sah ha khappud jong ka international border ki ïakynduh.
Ia kane ka jingleit jngoh la pynkut da kaba u Rai u la kyntu ia ki bor pahara ba kin long kiba husiar bad kyrpad ia ki nongshong shnong ba kin dang iai kyrshan ia ki jingpyrshang ban pynneh pynsah ia ka jingsuk, jingshong suk shong sain bad ka jingshngain ha shilynter ka khappud India bad Myanmar.
